സൗദിയിൽ 140 പേർക്ക്​ കൂടി കോവിഡ്

റിയാദ്​: സൗദി അറേബ്യയിൽ പുതുതായി 140 പേർക്ക്​ കൂടി കോവിഡ് സ്ഥിരീകരിച്ചു. ഒരിടവേളക്ക്​ ശേഷം ഇൗ ദിവസങ്ങളിൽ നേരിയ വർധനയാണ്​ രേഖപ്പെടുത്തുന്നത്​. രാജ്യത്ത്​ വിവിധ ഭാഗങ്ങളിൽ ചികിത്സയിൽ കഴിഞ്ഞിരുന്നവരിൽ നാലുപേർ മരിച്ചതായും ആരോഗ്യമന്ത്രാലയം തിങ്കളാഴ്​ച പുറത്തുവിട്ട റിപ്പോർട്ട്​ വ്യക്തമാക്കി. ​158 രോഗബാധിതർ സുഖം പ്രാപിച്ചു. ഇതോടെ രാജ്യത്ത്​ റിപ്പോർട്ട്​ ചെയ്​ത കോവിഡ്​ കേസുകളുടെ ആകെ എണ്ണം 363949 ഉം രോഗമുക്തരുടെ എണ്ണം 355706 ഉം ആയി.

മരണസംഖ്യ 6295 ആയി ഉയർന്നു. അസുഖ ബാധിതരായി രാജ്യത്ത്​ ബാക്കിയുള്ള 1948 പേരിൽ 312 പേരുടെ നില ഗുരുതരാവസ്ഥയിലാണ്​​. ഇവർ രാജ്യത്തെ വിവിധ ആശുപത്രികളിലെ തീവ്രപരിചരണ വിഭാഗത്തിലാണ്​. ബാക്കിയുള്ളവരുടെ ആരോഗ്യസ്ഥിതി തൃപ്​തികരമാണ്​. രാജ്യത്തെ കോവിഡ്​ മുക്തി നിരക്ക്​ 97.7 ശതമാനമായി. മരണനിരക്ക്​ 1.7 ശതമാനമായി തുടരുന്നു​. കഴിഞ്ഞ 24 മണിക്കൂറിനിടെ വിവിധ മേഖലകളിൽ റിപ്പോർട്ട്​ ചെയ്​ത പുതിയ കോവിഡ്​ കേസുകൾ: റിയാദ്​ 43, കിഴക്കൻ പ്രവിശ്യ 30, മക്ക 28, ഖസീം 13, മദീന 6, നജ്​റാൻ 6, തബൂക്ക്​ 3, ഹാഇൽ 3, അസീർ 3, ജീസാൻ 2, അൽബാഹ 1, വടക്കൻ അതിർത്തി മേഖല 1, അൽജൗഫ്​ 1.