കോവിഡ്​: സൗദിയിൽ പ്രതിദിന മരണം നാലായി കുറഞ്ഞു

റിയാദ്​: സൗദി അറേബ്യയിൽ കോവിഡ്​ മൂലമുള്ള പ്രതിദിന മരണനിരക്ക്​ വീണ്ടും കുറഞ്ഞ്​​. ചികിത്സയിലായിരുന്ന നാലുപേരുടെ മരണം മാത്രമാണ്​​​ രാജ്യത്ത് വിവിധ ഭാഗങ്ങളിലായി വെള്ളിയാഴ്​ച റിപ്പോർട്ട്​ ചെയ്​തത്​. 97 പേർക്ക്​ പുതുതായി കോവിഡ്​ ബാധ സ്ഥിരീകരിച്ചു​. 171 രോഗബാധിതർ സുഖം പ്രാപിച്ചു. ഇതോടെ രാജ്യത്ത്​ റിപ്പോർട്ട്​ ചെയ്​ത കോവിഡ്​ കേസുകളുടെ ആകെ എണ്ണം 363582 ഉം രോഗമുക്തരുടെ എണ്ണം 355208 ഉം ആയി. മരണസംഖ്യ 6282 ആയി ഉയർന്നു.

അസുഖ ബാധിതരായി രാജ്യത്ത്​ ബാക്കിയുള്ളത്​ 2092 പേരാണ്​. ഇതിൽ 309 പേർ മാത്രമാണ്​ ഗുരുതരാവസ്ഥയിലുള്ളത്​. ഇവർ രാജ്യത്തെ വിവിധ ആശുപത്രികളിലെ തീവ്രപരിചരണ വിഭാഗത്തിലാണ്​. ബാക്കിയുള്ളവരുടെ ആരോഗ്യസ്ഥിതി തൃപ്​തികരമാണ്​. രാജ്യത്തെ കോവിഡ്​ മുക്തി നിരക്ക്​ 97.7 ശതമാനമായി. മരണനിരക്ക്​ 1.7 ശതമാനമായി തുടരുന്നു​. കഴിഞ്ഞ 24 മണിക്കൂറിനിടെ വിവിധ മേഖലകളിൽ റിപ്പോർട്ട്​ ചെയ്​ത പുതിയ കോവിഡ്​ കേസുകൾ: റിയാദ്​ 46, മക്ക 20, കിഴക്കൻ പ്രവിശ്യ 15, മദീന 6, വടക്കൻ അതിർത്തി മേഖല 4, നജ്​റാൻ 2, ജീസാൻ 1, തബൂക്ക്​ 1, അസീർ 1, ഖസീം 1.