സൗദിയിൽ നിയമലംഘനത്തിന്​ ഒരാഴ്​ചക്കിടെ പിടിയിലായത്​ 15,088 വിദേശികൾ

റിയാദ്​: 'നിയമലംഘകരില്ലാത്ത രാജ്യം' എന്ന കാമ്പയി​െൻറ ഭാഗമായി സൗദി ആഭ്യന്തര മന്ത്രാലയം തുടരുന്ന പരിശോധനയിൽ രാജ്യത്ത്​ ഒരാഴ്​ക്കിടെ പിടിയിലായത്​ 15,088 വിദേശികൾ. ഇഖാമ (റെസിഡൻറ്​ പെർമിറ്റ്​) കാലാവധി കഴിഞ്ഞ 7508 പേരും അതിർത്തിനുഴഞ്ഞുകയറ്റക്കാരായ 5730 പേരും തൊഴിൽ നിയമം ലംഘിച്ച 1850 പേരുമാണ്​ അറസ്​റ്റിലായത്​. ഇവരെ രാജ്യത്തി​െൻറ വിവിധ ഭാഗങ്ങളിൽ നിന്നാണ്​ റെയ്​ഡിൽ പിടികൂടിയത്​. അതിർത്തിനുഴഞ്ഞുകയറ്റത്തിനിടെ തൽക്ഷണം പിടിയിലായത്​ 454 പേരാണ്​. ഇതിൽ 59 ശതമാനം എത്യോപ്യക്കാരും 34 ശതമാനം യമനികളും ഏഴ്​ ശതമാനം മറ്റ്​ വിവിധ രാജ്യക്കാരുമാണ്​.

അതിർത്തി നിയമം ലംഘിച്ച്​ രാജ്യത്തിന്​ പുറത്തുകടക്കാൻ ശ്രമിച്ച 21 പേരും പിടിയിലായിട്ടുണ്ട്​. വിവിധ നിയമലംഘകർക്ക്​ താമസ, വാഹന, ജോലി സൗകര്യമൊരുക്കിയ 16 ആളുകളെയും അറസ്​റ്റ്​ ചെയ്​തിട്ടുണ്ട്​. നിലവിൽ ഇതുവരെ നിയമനടപടി നേരിട്ടുകൊണ്ടിരിക്കുന്ന മൊത്തം നിയമലംഘകരുടെ എണ്ണം 91551 ആയി. ഇതിൽ 82841 പുരുഷന്മാരും 8710 സ്​ത്രീകളുമുണ്ട്​. സ്വന്തം നാടുകളിലേക്ക്​ കയറ്റി അയക്കാൻ ആവശ്യമായ രേഖകൾക്ക്​ വേണ്ടി അതത്​ രാജ്യങ്ങളുടെ സൗദിയിലെ എംബസികൾക്ക്​ കൈമാറിയ മൊത്തം കേസുകൾ 79,863 ആണ്​. 2170 പേരുടെ യാത്രാനടപടിക്രമങ്ങളെല്ലാം പൂർത്തിയായിരിക്കുകയാണ്​. ഉടൻ തന്നെ നാടുകടത്തും.

7663 വരെ ഇതിനകം നാടുകടത്തി. അതിർത്തി സുരക്ഷാ സംവിധാനം ലംഘിക്കുന്നവർക്ക് രാജ്യത്തേക്ക്​ പ്രവേശനം സുഗമമാക്കുകയോ അവർക്ക്​ യാത്രസൗകര്യമൊരുക്കുയോ അഭയം നൽകുകയോ മറ്റേതെങ്കിലും വിധത്തിൽ എന്തെങ്കിലും സഹായമോ സേവനമോ നൽകുകയോ ചെയ്യുന്നവരെ പിടികൂടി ശിക്ഷക്ക്​ വിധേയമാക്കുമെന്ന് ആഭ്യന്തര മന്ത്രാലയം താക്കീത്​ നൽകി. 15 വർഷം വരെ തടവും 10 ലക്ഷം റിയാൽ വരെ പിഴയും സ്വത്ത്​ കണ്ടുകെട്ടലുമാണ്​ ശിക്ഷ. ഇത്തരത്തിലുള്ള നിയമലംഘനങ്ങളും കുറ്റകൃത്യങ്ങളും ശ്രദ്ധയിൽപെട്ടാൽ പൊതുജനം മക്ക, റിയാദ്​ മേഖലകളിൽ 911 എന്ന നമ്പറിലും രാജ്യത്തി​െൻറ മറ്റെല്ലാ പ്രദേശങ്ങളിലും 999, 996 എന്നീ നമ്പറുകളിലും വിളിച്ചറിയിക്കണമെന്ന്​ മന്ത്രാലയം ആവശ്യപ്പെട്ടു.