മൂന്നര വർഷത്തിന് ശേഷം അതിർത്തി തുറന്നിട്ടു; ഖത്തറിൽ നിന്ന്​ സൗദിയിലേക്ക്​ വാഹനങ്ങളെത്തി

ജിദ്ദ: ഖത്തറിൽ നിന്ന്​ സൗദിയിലേക്ക്​ ആളുകളെത്തി തുടങ്ങി. ശനിയാഴ്​ച രാവിലെയാണ്​ സാൽവ പ്രവേശന കവാടം വഴി ഖത്തറിൽ നിന്നുള്ള ആദ്യത്തെ കാർ സൗദിയിലേക്ക്​ പ്രവേശിച്ചത്​. അതിർത്തി കവാടം തുറന്നതോടെ നിരവധി പേർ ഖത്തറിൽ നിന്ന്​ സൗദിയിലെത്തി​. പൂക്കൾ നൽകിയാണ്​ ആദ്യമെത്തിയവരെ കസ്​റ്റംസ്​ അധികൃതർ സ്വീകരിച്ചത്​. ശനിയാഴ്​ച പുലർച്ചെ ഖത്തർ പൗര​െൻറ വാഹനമാണ്​ ആദ്യം സൗദിയിൽ പ്രവേശിച്ചത്.

ഖത്തറിൽ നിന്നും അബൂ സംറ അതിർത്തി കടന്ന് സൗദിയിലെ സൽവ അതിർത്തി വഴി പ്രവേശിക്കുന്ന എല്ലാവരേയും സ്വീകരിക്കാൻ സജ്ജമാണെന്ന് സൗദി കസ്​റ്റംസ് അധികൃതർ അറിയിച്ചു.കസ്​റ്റംസ്​, ആരോഗ്യ നടപടികൾ പൂർത്തിയാക്കിയ ശേഷമാണ്​ ആളുകളെ പ്രവേശന കവാടം വഴി കടത്തിവിട്ടത്​. അതിർത്തികൾ തുറക്കാനുള്ള തീരുമാനം വന്ന ഉടനെ യാത്രക്കാരെ സ്വീകരിക്കാനാവശ്യമായ നടപടികൾ വിവിധ ഗവൺമെൻറ്​ വകുപ്പുകളുമായി സഹകരിച്ച്​ കസ്​റ്റംസ്​ വകുപ്പ്​ കവാടങ്ങളിൽ പൂർത്തിയാക്കിയിരുന്നു. ആവശ്യമായ സാ​േങ്കതിക സംവിധാനങ്ങൾ ഒരുക്കുകയും ജോലിക്കാരെയും നിയോഗിക്കുകയും ചെയ്​തിരുന്നു.

മൂന്നര​ വർഷത്തിലേറെയായി അടച്ചിട്ട കവാടമാണ്​ ഇപ്പോൾ തുറന്നിരിക്കുന്നത്​.​ ​കഴിഞ്ഞ ചൊവ്വാഴ്​ച അൽഉല ഉച്ചകോടിയിലാണ്​ സൗദിയും ഖത്തറും തമ്മിൽ കര, വ്യോമ, കടൽ അതിർത്തികൾ തുറക്കാനുള്ള ധാരണയിലെത്തിയത്​. ഖത്തറിനും യു.എ.ഇക്കുമിടയിലെ കര, കടൽ, വ്യോമ കവാടങ്ങളും തുറന്നു. അതിർത്തികൾ തുറന്ന നടപടിയെ ജി.സി.സി സെക്രട്ടറി ജനറൽ ഡോ. നാഇഫ്​ ഫലാഹ്​ അൽഹജ്​റഫ്​ സ്വാഗതം ചെയ്​തു. അൽഉല ഉച്ചകോടിയുടെ ഫലമായാണ്​ നടപടി. ഗൾഫ്​ സഹകരണ കൗൺസിലി​െൻറ ശക്തിയും ഉൗർജ്ജസ്വലതയും അതി​െൻറ ​െഎക്യവും വർധിപ്പിക്കുന്നതിനും നേട്ടങ്ങൾ സംരക്ഷിക്കുന്നതിനുമുള്ള വലിയ ശ്രദ്ധയും താൽപര്യവുമാണ്​ ഇത്​ പ്രതിഫലിപ്പിക്കുന്നത്​. എല്ലാ പ്രതിബന്ധങ്ങളെയും വെല്ലുവിളികളെയും വിവേകത്തോടെ മറിക്കടക്കാനുള്ള ഗൾഫ്​ രാഷ്​ട്ര നേതാക്കളുടെ കഴിവുകളും പ്രകടിപ്പിക്കുന്നതാണിത്​.

കൗൺസിൽ വെല്ലുവിളികൾ നേരിടു​േമ്പാൾ എല്ലായി​പ്പോഴും അവലംബിക്കുന്ന അഭയ സ്ഥാനമാണ്​ ഗൾഫ്​ രാഷ്​ട്രനേതാക്കൾ. പുതിയ ചുവടുവെപ്പിൽ ജി.സി.സി രാജ്യങ്ങളിലെ ജനങ്ങൾ സന്തുഷ്​ടരാണ്​. പ്രതീക്ഷയോടും അഭിലാഷങ്ങളോടും കൂടി ഭാവിയിലേക്കവർ ഉറ്റുനോക്കുകയാണ്​. പരസ്​പര ബന്ധങ്ങൾ ശക്തിപ്പെടുത്താനുള്ള അവസരമാണ്​ കൈവന്നിരിക്കുന്നത്​. രാജ്യങ്ങളെയും ജനങ്ങളെയും സേവിക്കുന്നതിനും വികസനം, പുരോഗതി, സുരക്ഷ, സ്ഥിരത എന്നിവയിലേക്ക്​ നയിക്കുന്നതിനും ഇത്​ സഹായിക്കുമെന്നും ജി.സി.സി സെക്രട്ടറി ജനറൽ പറഞ്ഞു.