സൗദിയിൽ പ്രതിദിന കോവിഡ് കേസുകൾ 1000 കടന്നു. മരണങ്ങളും കൂടുന്നു

ജിദ്ദ: ദീർഘ നാളുകൾക്ക് ശേഷം ഇന്ന് സൗദി അറേബ്യയിൽ പ്രതിദിന കോവിഡ് കേസുകൾ 1000 കടന്നു. ചൊവ്വാഴ്ച 1070 പുതിയ രോഗികളും 940 രോഗമുക്തരുമാണ് റിപ്പോർട്ട് ചെയ്തത്. ഇതോടെ രാജ്യത്ത് ആകെ റിപ്പോർട്ട് ചെയ്ത കേസുകളുടെ എണ്ണം 4,07,010 ഉം ആകെ രോഗമുക്തരുടെ എണ്ണം 3,90,538 ഉം ആയി.

ചികിത്സയിലുണ്ടായിരുന്നവരിൽ 12 പേർ കൂടി മരിച്ചു. ഇതോടെ രാജ്യത്ത് ആകെ മരണസംഖ്യ 6,846 എത്തി. വിവിധ ആശുപത്രികളിലും മറ്റുമായി 9,626 പേർ ചികിത്സയിലുണ്ട്. ഇവരിൽ 1,105 പേരുടെ നില ഗുരുതരമാണ്. ചികിത്സയിൽ കഴിയുന്ന ബാക്കിയുള്ളവരുടെ ആരോഗ്യനില തൃപ്തികരമാണ്. രാജ്യത്തെ കോവിഡ് മുക്തി നിരക്ക് 95.95 ശതമാനവും മരണനിരക്ക് 1.68 ശതമാനവുമാണ്. ഏറ്റവും കൂടുതൽ രോഗികളുള്ളത് റിയാദ് പ്രവിശ്യയിലാണ്.

വിവിധ പ്രവിശ്യകളിൽ പുതുതായി റിപ്പോർട്ട് ചെയ്ത രോഗികളുടെ എണ്ണം: റിയാദ് 483, മക്ക 209, കിഴക്കൻ പ്രവിശ്യ 157, മദീന 44, അസീർ 39, ഹാഇൽ 26, തബൂക്ക് 26, ജീസാൻ 25, അൽ ഖസീം 20, നജ്റാൻ 13, വടക്കൻ അതിർത്തി മേഖല 11, അൽ ജൗഫ് 9, അൽബാഹ 8.