രണ്ട്​ ഇന്ത്യൻ സ്​കൂളുകൾ ഉൾപ്പെടെ ദുബൈയിൽ പത്ത്​ വിദ്യാലയങ്ങൾ തുറക്കുന്നു

അബൂദബി: അടുത്ത അധ്യയന വർഷം ദുബൈ എമിറേറ്റിൽ രണ്ട്​ ഇന്ത്യൻ സ്​കൂളുകൾ ഉൾപ്പെടെ  പത്ത്​ പുതിയ സ്​കൂളുകൾ ആരംഭിക്കും. ഇന്ത്യൻ സ്​കൂളുകൾക്ക്​ പുറമെ യു.കെ, യു.എസ്​, കനേഡിയൻ, ഫ്രഞ്ച്​, അന്താരാഷ്​ട്ര പാഠ്യപദ്ധതിയിലുള്ളവയാണ്​ സ്​കൂളുകൾ. 
ശനിയാഴ്​ചയാണ്​ ദു​ൈബ വൈജ്ഞാനിക^മാനവ വികസന അതോറിറ്റി (കെ.എച്ച്​.ഡി.എ) ഇക്കാര്യം അറിയിച്ചത്​്.
ഖിസൈസിലാണ്​ ഇന്ത്യൻ പാഠ്യപദ്ധതി പ്രകാരമുള്ള രണ്ട്​ സ്​കൂളുകളും തുടങ്ങുന്നത്​.

അമിറ്റി എന്ന പേരിലുള്ള ഇന്ത്യൻ സ്​കൂളിൽ 15,000 മുതൽ 26,000 വരെ ദിർഹമായിരിക്കും വാർഷിക ഫീസ്​. ഗ്ലോബൽ ഇന്ത്യൻ ഇൻറർനാഷനൽ എന്ന പേരിലുള്ള സ്​കൂളിൽ 27,000 മുതൽ 37,000 വരെയാണ്​ വാർഷിക ഫീസ്​. 
യു.കെ പാഠ്യക്രമത്തിലുള്ള ദുബൈ ഹൈറ്റ്​സ്​ അക്കാദമി അൽ ബർഷ സൗത്തിലും ദേവ അക്കാദമി അൽ ഹുദൈബയിലും ന്യൂ ലാൻഡ്​സ്​ സ്​കൂൾ അൽ വർഖയിലും ദ ആൽഫ സ്​കൂൾ കിസൈസിലുമാണ്​. ദുബൈ ഹൈറ്റ്​സ്​ അക്കാദമിയിൽ 44,200 മുതൽ 58,400 വരെ ദിർഹവും ന്യൂ ലാൻഡ്​സ്​ സ്​കൂളിൽ 19,200 മുതൽ 26,400 വരെ ദിർഹവുമാണ്​ ഫീസ്​.

ദ ആൽഫ സ്​കൂളിൽ 22,280 മുതൽ 28,500 വരെ ദിർഹമാണ്​ ഫീസ്​. അന്താരാഷ്​ട്ര പാഠ്യക്രമത്തിലുള്ള നോർത്ത്​ ലണ്ടൻ കൊളീജിയറ്റ്​ സ്​കൂൾ മെയ്​ദാൻ സിറ്റിയിലാണ്​ പ്രവർത്തിക്കുക. 83,000 മുതൽ 130,000 വരെ ദിർഹമാണ്​ ഫീസ്​. മുഹമ്മദ്​ ബിൻ റാശിദ്​ ആൽ മക്​തും സിറ്റിയിൽ കനേഡിയൻ സ്​കൂളാണ്​ തുടങ്ങുന്നത്​. ബ്രിട്ടീഷ്​ കൊളംബിയ കനേഡിയൻ സ്​കൂൾ എന്ന്​ പേരുള്ള ഇവിടെ 40,000 മുതൽ 60,000 ദിർഹം വരെയാണ്​ ഫീസ്​. 
അൽഖൂസിൽ ആരംഭിക്കുന്ന ഫ്രഞ്ച്​ സ്​കൂൾ ലെയ്​സി ഫ്രാൻസെയ്​സ്​ ജീൻ മെർമോസിൽ 36,000 മുതൽ 46,000 ദിർഹം വരെയും നദ അൽ ശേബയിൽ തുടങ്ങുന്ന അമേരിക്കൻ പാഠ്യപദ്ധതിയിലുള്ള റൈസിങ്​ സ്​കൂളിൽ 38,000 മുതൽ 55,000 ദിർഹം വരെയാണ്​ ഫീസ്​.
ഉയർന്ന ഗുണമേന്മയുള്ള വിദ്യാഭ്യാസത്തിന്​ കൂടുതൽ സൗകര്യം വേണമെന്ന ആവശ്യം നിറവേറ്റാൻ ഇൗ സ്​കൂളുകൾ ഉപകരിക്കുമെന്ന്​ പ്രതീക്ഷിക്കുന്നതായി ദു​ൈബ വൈജ്ഞാനിക^മാനവ വികസന അതോറിറ്റി (കെ.എച്ച്​.ഡി.എ) അറിയിച്ചു.

ദുബൈയിൽ തുറക്കുന്ന ഒാരോ പുതിയ സ്​കൂളുകളും രക്ഷിതാക്കൾക്ക്​ ഗുണമേന്മയുള്ള വിദ്യാഭ്യാസം തെരഞ്ഞെടുക്കാൻ കൂടുതൽ അവസരം നൽകുമെന്ന്​ കെ.എച്ച്​.ഡി.എ ഡയറക്​ടർ ജനറൽ ഡോ. അബ്​ദുല്ല ആൽ കറം അഭിപ്രായപ്പെട്ടു. 
സഹകരണത്തിലും പരിഷ്​കരണത്തിലും ക്ഷേമത്തിലും അധിഷ്​ഠിതമായ വിദ്യാഭ്യാസ സംസ്​കാരത്തിലേക്ക്​ പുതിയ സ്​കൂളുകളെ സ്വാഗതം ചെയ്യുന്നതായും അദ്ദേഹം കൂട്ടിച്ചേർത്തു. വിദ്യാർഥികൾക്ക്​ വിജയവും ക്ഷേമവും ഉറപ്പാക്കുന്നതിനും സമൂഹത്തെ സേവിക്കുന്നതിനും സെപ്​റ്റംബറിൽ പുതിയ സ്​കൂളുകൾ ആരംഭിക്കുകയാണെന്ന്​ കെ.എച്ച്​.ഡി.എ വിദ്യാഭ്യാസ വികസന എക്​സിക്യൂട്ടീവ്​ ഡയറക്​ടർ ഖൽദൂം ആൽ ബലൂഷി പറഞ്ഞു. 
വ്യത്യസ്​തമായ സ്​ഥലങ്ങളിലും ചെലവിലും പാഠ്യപദ്ധതിയിലുമുള്ള സ്​കൂളുകൾ ഉന്നത നിലവാരമുള്ള അധ്യാപനവും പഠനവും ലഭ്യമാക്കുമെന്നും കൂടുതൽ വിദ്യാലയങ്ങളെന്ന ദുബൈയുടെ  ആവശ്യകത നിറവേറ്റുമെന്നും അദ്ദേഹം പറഞ്ഞു. 
2007 മുതൽ 72 പുതിയ സ്​കൂളുകൾ ദുബൈയിൽ പ്രവർത്തനം ആരംഭിച്ചിട്ടുണ്ട്​.