രോഗം മൂലം ജോലിചെയ്യാനാവുന്നില്ല; സത്താർ ഷാജിക്ക്​ നാടണയാൻ കടക്കെണി തടസ്സം 

റിയാദ്: രോഗം മൂലം ജോലി ചെയ്യാനാവാത്ത അവസ്​ഥയിൽ കഴിയുന്ന യുവാവിന് നാടണയാൻ സാമ്പത്തിക ബാധ്യത തടസ്സം. തിരുവനന്തപുരം പൂജപ്പുര സ്വദേശി   സത്താർ ഷാജിയാണ്​ നാട്ടിൽ പോകാനാവാതെ ദുരിതജീവിതം നയിക്കുന്നത്​. ഹാഇലിൽ സ്പോൺസറോടൊപ്പം ജോലി ചെയ്തു വരുന്നതിനിടെ  നെഞ്ച് വേദന   അനുഭവപ്പെട്ടതിനെ തുടർന്ന്​ ആശുപത്രിയിലായിരുന്നു.  

ദിനംപ്രതി ആരോഗ്യ സ്ഥിതി മോശമാവുകയും ജോലിചെയ്യാൻ കഴിയാതെ വരികയും ചെയ്തപ്പോൾ നാട്ടിൽ   പോകാൻ സ്‌പോൺസറോട് അനുവാദം ചോദിച്ചു. എന്നാൽ സാമ്പത്തിക ഇടപാട് ഉണ്ടെന്നു കാണിച്ച്​ സ്പോൺസർ  കേസിൽ കുടുക്കി എന്നാണ്​ സത്താർ ഷാജി  പറയുന്നത്​.
വിഷയത്തിൽ പ്ലീസ് ഇന്ത്യ (പ്രവാസി ലീഗൽ എയ്ഡ് സെൽ) ഇടപെടുകയും പ്രസിഡൻറ്​ ഷാനവാസ്‌ രാമഞ്ചിറ സ്പോൺസറുമായി പ്രശ്നപരിഹാരത്തിനുള്ള  ശ്രമങ്ങൾ നടത്തുകയും ചെയ്യുന്നുണ്ട്​.  

അതേ സമയം നിത്യ ചെലവിനോ മരുന്നിനോ പോലും വകയില്ലാതെ കഴിയുകയാണ് സത്താർ ഷാജി. ഭാര്യയും രണ്ടു മക്കളും അടങ്ങുന്ന കുടുംബം  നാട്ടിൽ ഇദ്ദേഹത്തെ ആശ്രയിച്ചുകഴിയുന്നുണ്ട്​​. മാതാവ് ഏതാനും ദിവസങ്ങൾക്കു മുമ്പാണ്​ മരിച്ചത്​. പ്ലീസ് ഇന്ത്യ   (പ്രവാസി ലീഗൽ എയ്ഡ് സെൽ)  നേതൃത്വത്തിൽ ചെറിയ സഹായം എത്തിച്ചു കൊടുത്തിരുന്നു.  കടക്കെണിയിൽ അകപ്പെട്ട  തന്നെ സഹായിക്കാൻ സുമനസ്സുകൾ   തയാറാകും എന്ന പ്രതീക്ഷയിലാണ് സത്താർ ഷാജി.  കൂടുതൽ വിവരങ്ങൾക്ക്​  പ്ലീസ് ഇന്ത്യ (പ്രവാസി ലീഗൽ എയ്ഡ് സെൽ )പ്രസിഡൻറ്​ ഷാനവാസ്‌ രാമഞ്ചിറ  0591932463. വൈസ് പ്രസിഡൻറ്​ മൻസൂർ കാരയിൽ 0549882200 സെക്രട്ടറി സൈഫുദ്ദീൻ എടപ്പാൾ 0502417945 എന്നിവരെ ബന്ധപ്പെടാവുന്നതാണ്