സമീപകാല വിധികൾ കുടുംബ ബന്ധങ്ങളെ ശിഥിലമാക്കും -തനിമ

അൽഖോബാർ: സ്വവർഗ രതി, അവിഹിത ബന്ധം തുടങ്ങിയ വിഷയത്തിൽ സുപ്രീം കോടതിയുടെ ഈയിടെ ഉണ്ടായ വിധികൾ കുടുംബ ബന്ധങ്ങളെ ശിഥിലമാക്കുമെന്നും നാട്ടിൽ അരാജകത്വം സൃഷ്​ടിക്കുമെന്നും തനിമ കേന്ദ്ര പ്രസിഡൻറ്​ കെ.എം ബഷീർ. തനിമ അൽഖോബാർ ഘടകം ‘ആനുകാലിക കോടതി വിധികളും ധാർമികതയും’ എന്ന വിഷയത്തിൽ നടത്തിയ പരിപാടിയിൽ സംസാരിക്കുകയായിരുന്നു അദ്ദേഹം. കുടുംബ ബന്ധങ്ങളെ സംരക്ഷിക്കുന്നതിൽ മഹനീയ മാതൃക തുടരുന്ന രാജ്യമാണ് ഇന്ത്യ. ഇതിനെയൊക്കെ അതിലംഘിക്കുന്നതാണ് കോടതി വിധികൾ. മുതലാളിത്ത കമ്പോളത്തി​​​െൻറ ഭാഗമായാണ് ഇത്തരം നിയമങ്ങൾ പ്രാബല്യത്തിലാക്കുന്നത്​.

ഇൗ കാലഘട്ടത്തിലും നന്മയിലും ധാർമികതയിലും അടിയുറച്ചു മുന്നോട്ട് പോകാൻ നമുക്കാവേണ്ടതുണ്ടെന്നും അദ്ദേഹം പറഞ്ഞു. ഭിന്നശേഷിക്കാരെ പ്രത്യേക സത്വമാക്കി മാറ്റി നിർത്തുകയല്ല വേണ്ടത് അവരേയും സമൂഹത്തിന്റെ ഭാഗമാക്കുകയാണ് വേണ്ടതെന്നും അദ്ദേഹം കൂട്ടിച്ചേർത്തു. പരിപാടിയിൽ തനിമ അൽഖോബാർ പ്രസിഡൻറ്​ റഹ്​മത്തുല്ല അധ്യക്ഷത വഹിച്ചു. പ്രവിശ്യ പ്രസിഡൻറ്​ ഉമർ ഫാറൂഖ്, കേന്ദ്ര സെക്രട്ടറി മുജീബ് കോഴിക്കോട് എന്നിവർ സന്നിഹിതരായിരുന്നു. ആസിഫ് കക്കോടി സ്വാഗതവും ഹുസൈൻ നന്ദിയും പറഞ്ഞു. സൽമാൻ ഖിറാഅത്ത് നടത്തി. കോയ ചോലമുഖത്ത്, അബ്​ദുൽ ഹമീദ്, സൈദലവി പാറാടൻ എന്നിവർ പരിപാടി നിയന്ത്രിച്ചു.