സബീർ അലിയുടെ മൃതദേഹം ബുറൈദയിൽ ഖബറടക്കി

ബുറൈദ: കഴിഞ്ഞ മാസം നാലിന്​ ബുറൈദയിലെ താമസസ്ഥലത്ത് മരിച്ച നിലയില്‍ കണ്ടെത്തിയ കൊല്ലം സ്വദേശി സബീർ അലിയുടെ മൃതദേഹം ഖബറടക്കി. കുളത്തൂപ്പുഴ നെല്ലിമൂട് ലാമിയ മന്‍സില്‍ (ഈട്ടിവിള വീട്ടില്‍) അലിയാരു കുഞ്ഞ് - റംലാ ബീവി ദമ്പതികളുടെ മകന്‍ സബീര്‍ അലിയുടെ (42) മൃതദേഹമാണ് തിങ്കളാഴ്ച ബുറൈദ ഖലീജ് മസ്ജിദ് ഖബർസ്ഥാനിൽ ഖബറടക്കിയത്.

ലാമിയയാണ് സബീറി​െൻറ ഭാര്യ. മക്കള്‍: ആലിയ, ആദില്‍. ഏറെ നാളായി ബുറൈദയില്‍ സെയില്‍സ്മാനായി ജോലി ചെയ്​തിരുന്ന സമീര്‍ വലിയൊരു സുഹൃദ് വലയത്തി​െൻറ ഉടമയായിരുന്നു.

മരണാനന്തര നിയമനടപടികൾ പൂർത്തിയാക്കാൻ കെ.എം.സി.സി ബുറൈദ സെൻട്രൽ കമ്മിറ്റി വെൽഫെയർ വിങ്​ നേതൃത്വം നൽകി. സൗദിയിലെ വിവിധ വകുപ്പുകളുമായി ബന്ധപ്പെട്ട രേഖകൾ ലഭിക്കുന്നതിനുണ്ടായ താമസമാണ് ഖബറടക്കം വൈകാൻ കാരണമെന്ന് കെ.എം.സി.സി ഭാരവാഹി ബഷീർ വെള്ളില പറഞ്ഞു.