റോയൽ കമീഷൻ വികസനം: 1.3 ശതകോടി റിയാലി​െൻറ കരാറുകൾ ഒപ്പുവെച്ചു

യാമ്പു: വിവിധ റോയൽ കമീഷനുകളിലെ നിർമാണ പദ്ധതികൾക്കായി 1.3 ശതകോടി റിയാലി​​​െൻറ 11 കരാറുകളിൽ അധികൃതർ ഒപ്പുവെച്ചു. ജുബൈൽ, യാമ്പു, റാസ് അൽ ഖൈർ, ജിസാൻ റോയൽ കമീഷൻ നഗരങ്ങളുടെ വികസനത്തിനും പുതിയ നിർമാണങ്ങൾക്കും പരിഷ്കാരങ്ങൾക്കും വേണ്ടിയാണ് ഉടമ്പടി. ജുബൈൽ, യാമ്പു റോയൽ കമീഷൻ മേധാവി എൻജി. അബ്​ദുല്ല ഇബ്നു ഇബ്രാഹീം അസഹ്ദാനാണ്​ പ്രശസ്ത കമ്പനി മേധാവികളുമായി കരാറിൽ ഒപ്പുവെച്ചത്.
വ്യവസായ നഗരങ്ങളിലെ പ്രധാന റോഡുകൾ, പാലങ്ങൾ, വൈദ്യുതി വികസനം, വിദ്യാഭ്യാസ സ്ഥാപനങ്ങൾ,മെഡിക്കൽ സ​​െൻററുകൾ, വ്യവസായ സംരംഭങ്ങൾ, മെയിൻറനൻസ് പ്രവൃത്തികൾ എന്നിവ നടത്താനുള്ള തീരുമാനമാണ് അംഗീകരിക്കപ്പെട്ടത്.

സുരക്ഷക്കുള്ള ആധുനിക സംവിധാനങ്ങൾ, ലാൻഡ്​ സ്കേപിങ്, ഉദ്യാന നിർമാണം എന്നിവ പദ്ധതിയിൽ ഉൾപെടും. കരാറിൽ ഒപ്പുവെച്ച പദ്ധതികൾ റോയൽ കമീഷൻ ഉന്നത അതോറിറ്റി മേൽനോട്ടത്തിൽ നടപ്പിലാക്കാനും വ്യവസ്ഥ ചെയ്തിട്ടുണ്ട്. ദേശീയ പരിവർത്തന പദ്ധതിയുടെ ഭാഗമായി​ വ്യവസായ നഗരങ്ങളെ മാറ്റിപ്പണിയാനും ഇത്തരം കരാറുകൾ നടപ്പിലാക്കുക വഴി സാധിക്കുമെന്നും ബന്ധപ്പെട്ടവർ കണക്കുകൂട്ടുന്നു.