ശാഇർ ട്രെയിൻ: ​മക്ക റോയൽ കമ്മീഷനും സൗദി റെയിൽവേയും കരാർ ഒപ്പുവെച്ചു

ജിദ്ദ: മശാഇർ ട്രെയിൻ പ്രവർത്തിപ്പിക്കുന്നതിന്​ മക്ക, മശാഇർ റോയൽ കമ്മീഷനും സൗദി റെയിൽവേ കമ്പനി (സാർ)യും തമ്മിൽ കരാർ ഒപ്പുവെച്ചു. ട്രെയിൻ സേവനം, റിപ്പയറിങ്​, പ്രവർത്തിപ്പിക്കൽ എന്നിവ കരാറിലു​ൾപ്പെടും. മക്ക വികസന അതോറിറ്റിയുടെയും ധനമന്ത്രാലയത്തിന്റെയും പങ്കാളിത്തതോടെയായിരിക്കും കരാർ നടപ്പിലാക്കുക. അഞ്ച്​ വർഷത്തേക്കാണ്​​ കരാർ. ഈ കാലയളവിൽ ട്രെയിനിലെ സേവനങ്ങൾ, റിപ്പയറിങ്​, പ്രവർത്തിപ്പിക്കൽ എന്നിവക്ക്​ പുറമെ സ്​റ്റേഷനുകളിലെ കൗഡ്​ മാനേജ്​മെൻറ്​, സെക്യൂരിറ്റി, സ്റ്റേഷനുകളുടെയും അനുബന്ധ കേന്ദ്രങ്ങളുടെയും ഉപകരണങ്ങളുടെയും ഓപറേഷൻ സംവിധാനങ്ങളുടെയും നിയന്ത്രണവും മേൽനോട്ടവും റെയിൽവേ കമ്പനിക്കായിരിക്കും.

ഹജ്ജ്​ തീർഥാടകർക്ക്​ നൽകുന്ന സേവനങ്ങൾ മികച്ചതാക്കുകയും സൗകര്യങ്ങളുടെ കാര്യക്ഷമത വർധിപ്പിക്കുകയും ചെയ്യണമെന്ന​ സർക്കാർ​ നിർദേശത്തെ തുടർന്നാണ്​ സൗദി റെയിൽവേ കമ്പനിയുമായി കരാർ ഒപ്പുവെച്ചിരിക്കുന്നതെന്ന്​​ റോയൽ കമ്മീഷൻ സി.ഇ.ഒ എൻജിനീയർ അബ്​ദുറഹ്​മാൻ അദാസ്​ പറഞ്ഞു. മശാഇർ ട്രെയിൻ പ്രവർത്തിപ്പിക്കുന്നതിലൂടെ തീർഥാടകർക്ക്​ നൽകുന്ന ​സേവനം മികച്ചതാക്കുന്നതിൽ പങ്കാളിയാവാൻ തെരഞ്ഞെടുത്തതിൽ വളരെ സന്തോഷമുണ്ടെന്ന്​ സൗദി റെയിൽവേ സി.ഇ.ഒ ഡോ. ബശാർ അൽമാലിക്​ പറഞ്ഞു. കഴിഞ്ഞ വർഷം മശാഇർ​ ട്രെയിൻ പ്രവർത്തിപ്പിക്കൽ ഏറ്റെടുത്തതു മുതൽ സേവനങ്ങൾ മികച്ചതാക്കാനാണ്​ കമ്പനി ശ്രമിച്ചുകൊണ്ടിരിക്കുന്നത്​. അടുത്തഘട്ടത്തിലും റോയൽ കമ്മീഷനുമായി സഹകരിച്ചു പ്രവർത്തനം തുടരുമെന്നും അദ്ദേഹം പറഞ്ഞു.