റിയാദിൽനിന്ന് അൽ ഖസീമിലേക്ക് നാല് വഴികൾ: യാത്രക്കാർക്ക് സൗകര്യമൊരുക്കി റോഡ്സ് അതോറിറ്റി

റിയാദ്: സൗദിയിലെ പ്രമുഖ വിനോദസഞ്ചാര-കാർഷിക കേന്ദ്രമായ അൽ ഖസീമിലേക്ക് റിയാദിൽനിന്ന് യാത്ര ചെയ്യുന്നവർക്കായി നാല് പ്രധാന പാതകൾ സൗദി റോഡ്സ് ജനറൽ അതോറിറ്റി പരിചയപ്പെടുത്തി. ചരിത്രപ്രസിദ്ധമായ കൊട്ടാരങ്ങളും വിശാലമായ കൃഷിയിടങ്ങളും നേരിട്ടറിയാൻ എത്തുന്ന സഞ്ചാരികൾക്ക് യാത്ര കൂടുതൽ എളുപ്പമാക്കുകയാണ് ഇതി​െൻറ ലക്ഷ്യം.

യാത്രക്കാരുടെ സൗകര്യമനുസരിച്ച് വ്യത്യസ്ത ദൂരവും സമയവുമുള്ള വഴികൾ തെരഞ്ഞെടുക്കാം. ഇതിൽ ഏറ്റവും വേഗത്തിൽ എത്താവുന്ന ഒന്നാം പാത റിയാദിൽനിന്ന് ആരംഭിച്ച് അൽ മജ്മഅഃ വഴിയാണ് അൽ ഖസീമിലെത്തുന്നത്. 342 കിലോമീറ്റർ ദൈർഘ്യമുള്ള ഈ യാത്രക്ക് മൂന്നര മണിക്കൂർ സമയമെടുക്കും. ദറഇയ, ഹുറൈമില, ശഖ്‌റ എന്നീ സ്ഥലങ്ങളിലൂടെ കടന്നുപോകുന്ന രണ്ടാമത്തെ പാതക്ക് 394 കിലോമീറ്റർ ദൂരവും നാല്​ മണിക്കൂർ യാത്രാസമയവുമാണുള്ളത്.

മൂന്നാമത്തെ പാത മുസാഹ്​മിയ, ദുർമ, ശഖ്‌റ എന്നീ പ്രദേശങ്ങളിലൂടെ സഞ്ചരിക്കുന്നു. 397 കിലോമീറ്റർ ദൈർഘ്യമുള്ള ഇതിലൂടെയുള്ള യാത്രക്കും നാല്​ മണിക്കൂർ സമയമെടുക്കും. നാലാമത്തെ പാത അൽ ഖുവയ്യിയ, അൽ മുഹമ്മദിയ, സാജിർ വഴി കടന്നുപോകുന്നതാണ്. 691 കിലോമീറ്റർ ദൈർഘ്യമുള്ള ഈ വലിയ യാത്ര പൂർത്തിയാക്കാൻ ഏകദേശം ആറ്​ മണിക്കൂർ സമയമെടുക്കും.

സൗദിയുടെ വടക്കൻ-മധ്യ ഭാഗത്ത് സ്ഥിതി ചെയ്യുന്ന അൽ ഖസീം രാജ്യത്തെ ഏറ്റവും വലിയ കാർഷിക മേഖലകളിലൊന്നാണ്. ലോകത്തിലെ തന്നെ ഏറ്റവും വലിയ ഈന്തപ്പന തോട്ടങ്ങളിൽ ഒന്നും ഏറ്റവും വലിയ ഈത്തപ്പഴ വിപണിയും അൽ ഖസീമിലാണ് സ്ഥിതി ചെയ്യുന്നത്. പുതിയ യാത്രാസൗകര്യങ്ങൾ മേഖലയുടെ വിനോദസഞ്ചാര-സാമ്പത്തിക വളർച്ചയ്ക്ക് വലിയ ഊർജ്ജമേകും.