‘റോഡ്​സ്​ ഒാഫ്​ അറേബ്യ’ പ്രദർശനം ഏഴുവർഷത്തിന്​ ശേഷം വീണ്ടും റിയാദിൽ

റിയാദ്​: സൗദി അറേബ്യയുടെ പുരാവസ്​തു ശേഖരത്തിലെ അമൂല്യ വസ്​തുക്കൾ വീണ്ടും റിയാദിലെത്തുന്നു. ലോകപ്രശസ്​തമായ ‘റോഡ്​സ്​ ഒാഫ്​ അറേബ്യ’ പ്രദർശനമാണ്​ വിവിധ ഭൂഖണ്ഡങ്ങളിലെ സന്ദർശനത്തിന്​ ശേഷം തിരി​ച്ചെത്തുന്നത്​. 2010 ലാണ്​ ഇൗ വസ്​തുക്കൾ ലോകത്തെ പ്രമുഖ കാഴ്​ച ബംഗ്ലാവുകളിൽ പ്രദർശിപ്പിക്കാനായി കൊണ്ടുപോയത്​. റിയാദിൽ നവംബർ ഏഴിന്​ ആരംഭിക്കുന്ന പ്രഥമ സൗദി ആർക്കിയോളജി കൺവെൻഷ​​​െൻറ ഭാഗമായാണ്​ മടങ്ങിവരവ്​. 50 ദിവസത്തോളം ഇവ റിയാദിലുണ്ടാകും. സൗദി അറേബ്യയുടെ സമൃദ്ധമായ ചരിത്രത്തി​​​െൻറ പ്രതീകങ്ങൾ നേരിട്ട്​ കാണാൻ തലസ്​ഥാന വാസികൾക്ക്​ അങ്ങനെ അവസരമൊരുങ്ങുകയാണ്​. 

ദക്ഷിണ കൊറിയൻ തലസ്​ഥാനമായ സോളിലെ നാഷനൽ മ്യൂസിയത്തിലാണ്​ ‘റോഡ്​സ്​ ഒാഫ്​ അറേബ്യ’ അവസാനമായി പ്രദർശിപ്പിച്ചത്​. രണ്ടുമാസം നീണ്ട പ്രദർശനം ആഗസ്​റ്റ്​ അവസാനം കഴിഞ്ഞിരുന്നു. ചൈനയിലെ ​ബീജിങ്ങ്​ പ്രദർശനത്തിന്​ ശേഷമാണ്​ കൊറിയയിലേക്ക്​ കൊണ്ട​ുപോയത്​. ഏഴുവർഷം കൊണ്ട്​ മൊത്തം 11 ഇടങ്ങളിലാണ്​ ‘റോഡ്​സ്​ ഒാഫ്​ അറേബ്യ’ പര്യടനം നടത്തിയത്​. ചൈനക്കും കൊറിയക്കും പുറമേ, നാലു യൂറോപ്യൻ നഗരങ്ങളിലും അഞ്ചു അമേരിക്കൻ നഗരങ്ങളിലും. 

ലോക പ്രശസ്​തമായ പാരീസിലെ ലൂവ്​റ്​ മ്യൂസിയത്തിൽ നിന്നാണ്​ 2010 ൽ തുടങ്ങിയത്​. പിന്നീട്​ സ്​പെയിനിലെ ബാർസലോനയിലുള്ള ലാ ഷൈക്​സ ഫൗണ്ടേഷൻ, മോസ്​കോയിലെ ഹെർമിറ്റേജ്​ മ്യൂസിയം, ബെർലിനിലെ പെർഗാമൻ മ്യൂസിയം എന്നിവിടങ്ങളിലെ പ്രദർശനത്തിന്​ ശേഷം അമേരിക്കയിലേക്ക്​ തിരിച്ചു. അവിടെ വാഷിങ്​ടണിലെ സ്​മിത്ത്​സോണിയൻ ഇൻസ്​റ്റിറ്റ്യൂഷൻ, പിറ്റ്​സ്​ബർഗിലെ കാർനഗി മ്യൂസിയം, ഹൂസ്​റ്റൺ ഫൈൻ ആർട്​സ്​ മ്യൂസിയം, കൻസാസിലെ നെൽസൺ അറ്റ്​കിൻസ്​ മ്യൂസിയം, സാൻ ഫ്രാൻസിസ്​കോയിലെ ഏഷ്യൻ ആർട്​സ്​ മ്യൂസിയം എന്നിവിടങ്ങളിലും പ്രദർശിപ്പിച്ചു. പിന്നീടാണ്​ ചൈനയിലേക്കും ഒടുവിൽ കൊറിയയിലും എത്തിച്ചത്​.