കിഴക്കൻ പ്രവിശ്യയിൽ കനത്ത മൂടൽമഞ്ഞ്​: വ്യോമ, റോഡ്​ ഗതാഗതം തടസ്സപ്പെട്ടു

ദമ്മാം: കിഴക്കൻ പ്രവിശ്യയിൽ പരക്കെ കനത്ത മൂടൽ മഞ്ഞ്​. ഞായർ പുലർച്ചെ അനുഭവപ്പെട്ട കനത്ത മൂടല്‍ മഞ്ഞിനെ തുടർന്ന്​ വ്യോമ, റോഡ് ഗതാഗതം താറുമാറായി. ശൈത്യകാലത്തി​​​െൻറ വരവിന്​ ശേഷം ശേഷം ഇതാദ്യമായാണ് ഇത്രയധികം മൂടൽ മഞ്ഞ്​ കിഴക്കൻ സൗദിയിൽ അനുഭവപ്പെടുന്നത്. മൂടല്‍ മഞ്ഞ് കാഴ്ചക്ക്​ തടസ്സം സൃഷ്​ടിച്ചതുമൂലം നിരവധി വിമാന സര്‍വീസുകള്‍ വൈകിയെന്ന് അധികൃതര്‍ അറിയിച്ചു. ശനിയാഴ്​ച രാത്രി ദമ്മാമിൽ നിന്ന്​ കൊച്ചിയിലേക്കും ദമ്മാമിൽ നിന്ന്​ തിരുവനന്തപുരത്തേക്കും യാത്ര പുറപ്പെടേണ്ടിയിരുന്ന ജെറ്റ്​ എയർവേയ്​സ്​ മുടങ്ങി. ഫൈനൽ എക്​സിറ്റിൽ നാട്ടിലേക്ക്​ പോകാനെത്തിയവർ ഉൾപ്പെടെ 17 മണിക്കൂറിലേറെ വിമാനത്താവളത്തിൽ കാത്തിരുന്ന്​ വലഞ്ഞു. ദമ്മാമിൽ നിന്ന്​ തിരുവനന്തപുരത്തേക്കുള്ള ജെറ്റ്​ എയർവേയ്​സ്​ വിമാനം രാത്രി 11.55 നും കൊച്ചിയിലേക്കുള്ളത്​ രാത്രി 9.30 നും പുറപ്പെടേണ്ടിയിരുന്നു. പല തവണ വൈകു​മെന്നറിയിച്ച്​ സമയം മാറ്റിപ്പറഞ്ഞ അധികൃതർ ഒടുവിൽ വിമാനം റദ്ദാക്കുകയാണെന്ന്​ നീണ്ട മണിക്കുറുകൾക്ക്​ ശേഷമാണ്​ അറിയിച്ചത്​. കുട്ടികളും സ്​ത്രീകളുമടക്കമുള്ള യാത്രക്കാർ ഇതേ തുടർന്ന്​ ഏറെ ബുദ്ധിമുട്ടിലായി. റീ എൻട്രിയിൽ പോകാനെത്തിയവരോട്​ പിന്നീട്​ വിവരം അറിയിക്കാമെന്ന്​ പറഞ്ഞ്​ വിമാനത്താവളത്തിന്​ പുറത്തുപോകാൻ അനുവദിച്ചു. പക്ഷേ, ഫൈനൽ എക്​സിറ്റിൽ ഉള്ളവരോട്​ വിമാനത്താവത്തിൽ തന്നെ ഇരിക്കാൻ നിർദേശിച്ചു. അവർക്ക്​ വേണ്ട ഭക്ഷണമോ വെള്ളമോ മറ്റ്​ അവശ്യ സംവിധാനങ്ങളോ ലഭിച്ചില്ലെന്ന്​ യാത്രക്കാർ പറയുന്നു. കൊച്ചിയിലേക്കുള്ള ​ജെറ്റ്​ എയർവേസ്​ ഞായർ രാത്രി എ​േട്ടാടെ തിരിക്കുമെന്നാണ്​ അറിയുന്നത്​. 

ദമ്മാം, അൽഖോബാർ, ജുബൈൽ, നാരിയ്യ, അൽഖഫ്​ജി എന്നിങ്ങനെ പ്രവിശ്യയുടെ മിക്കയിടങ്ങളും കനത്ത മഞ്ഞിലകപ്പെട്ടു. ഗതാഗതത്തെയും, വ്യവസായ സ്ഥാപനങ്ങളെയും, സ്കൂളി​​​െൻറ പ്രവർത്തനങ്ങളെയും സാരമായി ബാധിച്ചു. ചില പ്രാദേശിക വിദ്യാഭ്യാസ സ്​ഥാപനങ്ങൾക്ക്​ അവധി പ്രഖ്യാപിച്ചിരുന്നു. അതിവേഗ പാതയിലും ചെറിയ നിരത്തുകളിലും ദൂരക്കാഴ്​ച കുറവായിരുന്നതിനാൽ മണിക്കൂറുകളോളം ഗതാഗതക്കുരുക്ക്​ നേരിട്ടു. നിരവധി റോഡപകടങ്ങളും റിപ്പോര്‍ട്ട് ചെയ്തിട്ടുണ്ട്​. ദമ്മാം^ അൽഅഹ്​സ അതിവേഗ പാതയിൽ സെക്കൻറ്​ ഇൻഡസ്​ട്രിയൽ സിറ്റിക്ക്​ സമീപം നാലു വാഹനങ്ങൾ ഡിവൈഡറിലിടിച്ച്​ അപകടമുണ്ടായി. ഗതാഗത വകുപ്പി​​​െൻറയും സിവിൽ ഡിഫൻസി​​​െൻറയും നേത​ൃത്വത്തിൽ രക്ഷാപ്രവർത്തനം നടത്തി. ജുബൈലിൽ നിന്നും ദൂരെയുള്ള വിവിധ പദ്ധതികളിലേക്ക് ജീവനക്കാരേയും വഹിച്ചു പോകുന്ന ബസുകൾ ഓടിയില്ല. വരും ദിവസങ്ങളിലും മൂടൽമഞ്ഞിനും മഴക്കും സാധ്യതയുണ്ടെന്നും പുറത്തിറങ്ങുന്നവരും വാഹനങ്ങളും ജാഗ്രത പാലിക്കണമെന്നുംഅധികൃതർ അറിയിച്ചു.