റിയാദും സിങ്കപ്പൂരും ഇനി കൂടുതൽ അടുത്തേക്ക്, നേരിട്ടുള്ള വിമാന സർവിസ് ജൂണിൽ ആരംഭിക്കും

റിയാദ്: സൗദി അറേബ്യയുടെ തലസ്ഥാനമായ റിയാദിനെയും സിങ്കപ്പൂരിനെയും ബന്ധിപ്പിച്ചുകൊണ്ടുള്ള നേരിട്ടുള്ള വിമാന സർവിസുകൾ ഈ വർഷം ജൂണിൽ ആരംഭിക്കും. സൗദി എയർ കണക്റ്റിവിറ്റി പ്രോഗ്രാമും (എ.സി.പി) സിങ്കപ്പൂർ എയർലൈൻസും തമ്മിൽ ഇതുസംബന്ധിച്ച സഹകരണ കരാറിൽ ഒപ്പുവെച്ചു.

സൗദി ഗതാഗത, ലോജിസ്​റ്റിക്സ് മന്ത്രി സാലിഹ് അൽ ജാസർ, സിങ്കപ്പൂർ ഗതാഗത മന്ത്രി ജെഫ്രി സിയോവ് എന്നിവരുടെ സാന്നിധ്യത്തിലായിരുന്നു കരാർ കൈമാറ്റം. സൗദി അറേബ്യയെ ആഗോള വ്യോമഗതാഗത കേന്ദ്രമായി മാറ്റുക എന്ന ലക്ഷ്യത്തോടെയുള്ള സുപ്രധാന ചുവടുവെപ്പാണിത്. അത്യാധുനിക സൗകര്യങ്ങളുള്ള എ 350-900 വിമാനമാണ്​ സർവിസ്​ നടത്തുക. 303 പേർക്ക് യാത്ര ചെയ്യാൻ ശേഷിയുള്ള വിമാനം ആഴ്ചയിൽനാല് സർവിസുകൾ നടത്തും.

സിങ്കപ്പൂർ ചാങി അന്താരാഷ്​ട്ര വിമാനത്താവളത്തിൽ നിന്ന് റിയാദിലെ കിങ് ഖാലിദ് അന്താരാഷ്​ട്ര വിമാനത്താവളത്തിലേക്കും തിരിച്ചുമാണ്​ സർവിസ്​. ‘ദേശീയ ഗതാഗത ലോജിസ്​റ്റിക് സ്ട്രാറ്റജിയുടെ ഭാഗമായുള്ള ലക്ഷ്യങ്ങൾ കൈവരിക്കാൻ ഈ കരാർ സഹായിക്കും. തെക്കുകിഴക്കൻ ഏഷ്യൻ വിപണികളുമായി സൗദിയെ ബന്ധിപ്പിക്കുന്ന സുപ്രധാന പാലമായി ഈ പുതിയ റൂട്ട് മാറും’ -സൗദി സിവിൽ ഏവിയേഷൻ പ്രസിഡൻറ്​ അബ്​ദുൽ അസീസ് അൽദുവൈലിജ് പറഞ്ഞു.

സൗദി അറേബ്യയുടെ ടൂറിസം, വ്യാപാര മേഖലകൾക്ക് പുതിയ സർവിസ് വലിയ കരുത്തേകും. ബിസിനസ്​ ആവശ്യങ്ങൾക്കായി യാത്ര ചെയ്യുന്നവർക്കും വിനോദസഞ്ചാരികൾക്കും അന്താരാഷ്​ട്ര നിലവാരത്തിലുള്ള യാത്രാസൗകര്യം ഇതിലൂടെ ലഭ്യമാകും. വേഗത്തിൽ വളരുന്ന സൗദിയിലെ ബിസിനസ്​ സാഹചര്യങ്ങൾ കണക്കിലെടുത്താണ് റിയാദിലേക്ക് വീണ്ടും സർവിസ് ആരംഭിക്കാൻ തീരുമാനിച്ചതെന്ന് സിങ്കപ്പൂർ എയർലൈൻസ് ചീഫ് കൊമേഴ്‌സ്യൽ ഓഫിസർ ഗോ ചൂൺ ഫോങ് വ്യക്തമാക്കി. നിലവിൽ വിദേശ രാജ്യങ്ങളിലേക്ക് യാത്ര പ്ലാൻ ചെയ്യുന്നവർക്ക് കൂടുതൽ ഓപ്ഷനുകൾ നൽകുന്നതിനൊപ്പം സിങ്കപ്പൂർ വഴിയുള്ള കണക്റ്റിവിറ്റി വർധിപ്പിക്കാനും ഈ നീക്കം സഹായിക്കും.