സലിം കളക്കര റിയാദ് ഒ.ഐ.സി.സി പ്രസിഡൻറ്​

റിയാദ്: കോൺഗ്രസിന്റെ പ്രവാസി ഘടകമായ ഒ.ഐ.സി.സിയുടെ റിയാദ് സെൻട്രൽ കമ്മിറ്റി പ്രസിഡൻറായി സലിം കളക്കര ചുമതലയേറ്റു. കഴിഞ്ഞ 25 വർഷമായി റിയാദിൽ പ്രവാസി സാംസ്കാരിക സാമൂഹിക രംഗത്ത്​ സജീമായ അദ്ദേഹം ഒ.ഐ.സി.സി സീനിയർ വൈസ് പ്രസിഡൻറായിരിക്കെയാണ്​ നിലവിലെ പ്രസിഡൻറ്​ അബ്​ദുല്ല വല്ലാഞ്ചിറ ഒഴിഞ്ഞ പദവിയിൽ അവരോധിതനായത്​.

മൂന്നുവർഷ കലാവധിയിലേക്കുള്ള ഭാരവാഹി തെരഞ്ഞെടുപ്പിലുണ്ടായ ഒത്തുതീർപ്പ്​ ഫോർമുല ആദ്യ ഒരു വർഷം അബ്​ദുല്ല വല്ലാഞ്ചിറയും പിന്നീടുള്ള രണ്ട്​ വർഷം സലീം കളക്കരയും എന്നതായിരുന്നു. ആ ധാരണയനുസരിച്ചാണ്​ അബ്​ദുല്ല വല്ലാഞ്ചിറ പദവിയൊഴിഞ്ഞതും കഴിഞ്ഞദിവസം കെ.പി.സി.സി വർക്കിങ്​ പ്രസിഡൻറ്​ ടി. സിദ്ദീഖ്​ എം.എൽ.എയുടെ സാന്നിദ്ധ്യത്തിൽ റിയാദിൽ ചേർന്ന യോഗത്തിൽ സലീം കളക്കര ചുമതലയേറ്റെടുത്തതും.

പൊന്നാനിയിലെ പ്രസിദ്ധ കോൺഗ്രസ് കുടുംബമായ കളക്കര തറവാട്ടിൽ നിന്നും കേരള വിദ്യാർഥി പ്രസ്ഥാനത്തിലൂടെയാണ് കോൺഗ്രസ് സംഘടനാരംഗത്തേക്ക് സലീം കടന്നുവരുന്നത്. തുടർന്ന് യൂത്ത് കോൺഗ്രസ് ഇഴുവത്തിരുത്തി മണ്ഡലം പ്രസിഡൻറ്​, പൊന്നാനി ബ്ലോക്ക് കമ്മിറ്റി ജനറൽ സെക്രട്ടറി എന്നീ നിലകളിൽ പ്രവർത്തിച്ചു. സൗദിയിൽ എത്തിയതിനുശേഷവും കോൺഗ്രസി​െൻറ പ്രവാസി സംഘടനകളിൽ തുടക്കം മുതൽ സജീവ നേതൃത്വത്തിലുണ്ടായിരുന്നു. റിയാദിലെ വ്യത്യസ്ത ചേരികളിൽ നിന്നിരുന്ന പോഷക സംഘടനകളെ ഒ.ഐ.സി.സി എന്ന ഒറ്റ ചട്ടക്കൂടിനുള്ളിൽ ഒന്നിപ്പിക്കുന്നതിന്​ മറ്റ്​ സഹപ്രവർത്തകരോടൊപ്പം നിർണായക പങ്കു വഹിച്ചു.

രമേശ് ചെന്നിത്തല കെ.പി.സി.സി പ്രസിഡൻറ്​ ആയിരുന്നപ്പോഴാണ് റിയാദിലെ കോൺഗ്രസ് സംഘടനകൾ ഒ.ഐ.സി.സി എന്ന ഒറ്റ സംഘടനയായി മാറിയത്​. ആദ്യ പ്രസിഡൻറ്​ കുഞ്ഞി കുമ്പളക്ക്​ കീഴിൽ ദീർഘകാലം സീനിയർ വൈസ് പ്രസിഡൻറായി പ്രവർത്തിച്ചു. അതിനുശേഷമുണ്ടായ ​സംഘടനാ തെരഞ്ഞെടുപ്പിലാണ്​ പ്രസിഡൻറ് പദത്തി​െൻറ കാര്യത്തിൽ വീതംവെപ്പ്​ ഫോർമുലമുണ്ടായപ്പോൾ രണ്ടാമൂഴം സലീം കളക്കരയുടേതായത്​.​

28 വർഷമായി പ്രവാസത്തിലാണ്. നിലവിൽ റിയാദിൽ സ്വന്തമായി കമ്പനി നടത്തുന്നു. നിരവധി പേർക്ക് ജോലി നൽകിയ ബിസിനസ്​ സംരംഭകനാണ്​. ആരിഫ സഹധർമിണിയും വിദ്യാർഥികളായ മുഹമ്മദ് ആസിഫ്, ഫാത്തിമ നിദ, ഫാത്തിമ നിസ എന്നിവർ മക്കളുമാണ്​.