റിയാദ്​, ദമ്മാം, ജിദ്ദ ഉൾപ്പെടെ കൂടുതൽ നഗരങ്ങളിൽ 24 മണിക്കൂർ കർഫ്യൂ

റിയാദ്​: സൗദി അറേബ്യയിലെ കൂടുതൽ നഗരങ്ങളിലും മേഖലകളിലും 24 മണിക്കൂർ കർഫ്യൂ. റിയാദ്​, ദമ്മാം, തബൂക്ക്​, ദഹ്​റാൻ, ഹു ഫൂഫ്​ എന്നീ നഗരങ്ങളിലും ജിദ്ദ, ത്വാഇഫ്​, ഖത്വീഫ്​, അൽഖോബാർ എന്നീ മേഖലകളിലുമാണ്​ നിരോധനാജ്ഞ 24 മണിക്കൂറായി ദീ ർഘിപ്പിച്ചത്​. തിങ്കളാഴ്​ച രാത്രി മുതൽ നി​രോധനാജ്ഞ പ്രാബല്യത്തിലായി.

അനിശ്ചിതകാലത്തേക്കാണ്​ കർഫ്യൂ എന്നും ആഭ്യന്തര മന്ത്രാലയം അറിയിച്ചു. നിരോധനാജ്ഞ ഉള്ള ഭാഗങ്ങളിൽ താമസിക്കുന്നവർ ആ പ്രദേശം വിട്ട്​ സഞ്ചരിക്കാൻ പാടില്ല. പുറത്തുള്ളവർ അവിടങ്ങളിലേക്ക്​ കടക്കാനും പാടില്ല. ഭക്ഷണം, ആതുര​ശ​ുശ്രൂഷ തുടങ്ങിയ അത്യാവശ്യ കാര്യങ്ങൾക്കല്ലാതെ പുറത്തിറങ്ങാൻ പാടില്ല. അതും രാവിലെ ആറിനും ഉച്ചക്ക്​ മൂന്നിനും ഇടയിലാകണം. ഇൗ സമയത്ത്​ വാഹനത്തിൽ സഞ്ചരിക്കാം.

പക്ഷേ, വാഹനം ഒാടിക്കുന്നയാൾക്ക്​ പുറമെ ഒരാളും കൂടി മാത്രമേ വാഹനത്തിൽ പാടുള്ളൂ. ആശുപത്രികൾ, ഫാർമസികൾ, ഭക്ഷ്യവസ്​തുക്കൾ വിൽക്കുന്ന സ്ഥാപനങ്ങൾ, പെട്രോൾ സ്​റ്റേഷനുകൾ, ഗ്യാസ്​ സ്​​േറ്റാറുകൾ, ബാങ്ക്​, മെയിൻറനൻസ്​ സർവിസസ്​, പ്ലമ്പിങ്​ ടെക്​നീഷ്യന്മാർ, എയർകണ്ടീഷൻ ടെക്​നീഷ്യന്മാർ, ജലവിതരണം, മാലിന്യ നീക്കം തുടങ്ങിയ മേഖലയിലെ സ്ഥാപനങ്ങൾക്കും ജോലിക്കാർക്കും മാത്രം നിരോധനാജ്ഞ ബാധകമാകില്ല. ആഭ്യന്തരമന്ത്രാലയം സ്ഥിതിഗതികൾ നിരന്തരം നിരീക്ഷിക്കും. അതനുസരിച്ച്​ തീരുമാനങ്ങളിൽ മാറ്റം വേണമെ-ങ്കിൽ ആലോചിക്കും. എല്ലാവരും വീടുകളിൽ ഇരിക്കണം. കൂട്ടം കൂടരുത്​. എല്ലാവരും ക്വാറൻറീൻ സ്വയം പരിശീലിക്കണമെന്നും മന്ത്രാലയം ആവശ്യപ്പെട്ടു.