റിയാദ്​ വിമാനത്താവളത്തിൽ അന്വേഷണങ്ങൾക്ക്​ 10 ഭാഷകളിൽ മറുപടി

റിയാദ്​: യാത്രക്കാരുടെ അന്വേഷണങ്ങൾക്ക്​ മറുപടി നൽകാൻ റിയാദ്​ കിങ്​ ഖാലിദ്​ വിമാനത്താവളത്തിൽ 10 ഭാഷകളിൽ സൗകര്യം ഏർപ്പെടുത്തി. ലോകോത്തര നിലവാരത്തിൽ വിമാനത്താവളത്തെ ഏത്​ രാജ്യത്തുനിന്നുമുള്ള യാത്രക്കാരെ ഉൗഷ്​മളമായി വരവേൽക്കാൻ കഴിയും വിധം വികസിപ്പിക്കുന്നതി​​​​െൻറ ഭാഗമായാണ്​ ‘ആസ്​ക്​ മീ’ എന്ന പേരിൽ പുതിയ എൻക്വയറി കൗണ്ടറുകൾ തുറന്നത്​. 80ലേറെ സൗദി യുവതീ യുവാക്കളാണ്​ ഇൗ കണ്ടറുകളിൽ സേവനം അനുഷ്​ഠിക്കുന്നത്​.

വിവിധ ലോകരാജ്യങ്ങളിലെ ഭാഷയും സംസ്​കാരവും യാത്രക്കാരുടെ ഇഷ്​ടാനിഷ്​ടങ്ങളും സംബന്ധിച്ച്​ ഉന്നത പരിശീലനം ലഭിച്ചവരാണ്​ ഇൗ ജീവനക്കാർ. 24 മണിക്കൂറും പ്രവർത്തിക്കുന്ന കൗണ്ടറുകളിൽ നിന്ന്​ യാത്രക്കാരുടെ അന്വേഷണങ്ങൾക്ക്​ 10 ഭാഷകളിൽ മറുപടി ലഭിക്കും. കൗണ്ടറുകളിൽ നിന്നുള്ള സമീപനം ഉൗഷ്​മളമായിരിക്കും. നിലവിൽ ആറ്​ കൗണ്ടറുകളാണ്​ ഇൻറർനാഷനൽ ലോഞ്ചുകളിൽ സജ്ജീകരിച്ചിട്ടുള്ളത്​.

ആവശ്യത്തിന്​ അനുസരിച്ച്​ കൗണ്ടറുകളുടെ എണ്ണം കൂട്ടും. വാരാന്ത്യ അവധിയോ മറ്റ്​ പൊതു അവധിയോ ഒന്നുമില്ലാതെ കൗണ്ടറുകൾ പ്രവർത്തിക്കും. ഇത്​ സംബന്ധിച്ച വിവരം പുറത്തുവിട്ട വിമാനത്താവള അധികൃതർ ഏതൊക്കെ ഭാഷകളാണ്​ ഉൾപ്പെടുത്തിയിട്ടുള്ളതെന്ന്​ വ്യക്​തമാക്കിയിട്ടില്ല. ഹിന്ദിയും ഉൾപ്പെ​ട്ടിട്ടുണ്ടെന്നാണ്​ സൂചന.