ദുരിതബാധിതർക്ക്​ സഹായവുമായി സൗദി പൗരനും  ​

റിയാദ്​: കേരളത്തിലെ പ്രളയ ദുരിതബാധിതർക്ക് സഹായവുമായി സൗദി പൗരനും. ക്യാമ്പുകളിൽ കഴിയുന്നവർക്കുള്ള ആവശ്യവസ്​തുക്കളടങ്ങിയ കാർട്ടണുകളുമായി ബദർ അൽനുഫാഇയാണ്​ ഞായറാഴ്​ച വൈകീട്ട്​ ‘ഗൾഫ്​ മാധ്യമം’ റിയാദ്​ ഒാഫീസിൽ എത്തിയത്​. നൂറുകിലോമീറ്ററകലെ അൽഖർജിൽ നിന്നാണ്​​ ദുരിതകാലത്ത്​ മലയാളികളെ ചേർത്തുപിടിക്കാനുള്ള വെമ്പലുമായി ഇദ്ദേഹമെത്തിയത്​. അരി, പഞ്ചസാര, ഇൗത്തപ്പഴം, റെസ്​ക്​, പിസ്​ത, പരിപ്പ്​, പയർ തുടങ്ങി നിരവധി ഭക്ഷ്യവസ്​തുക്കളും ബ്ലാങ്കറ്റുകളുമാണ്​ വിവിധ കാർട്ടണുകളിലാക്കി​ കൊണ്ടുവന്നത്​. പത്രവും മീഡിയവൺ ചാനലും സീബ്രീസ്​ കാർഗോയും സംയുക്തമായി ദുരിതാശ്വാസ സാധനങ്ങൾ നാട്ടിലേക്ക്​ അയച്ചുകൊടുക്കുന്നുണ്ടെന്ന്​ മലയാളി സുഹൃത്തുക്കൾ വഴിയാണ്​ അദ്ദേഹം അറിഞ്ഞത്​. അൽഖർജിൽ സാമൂഹിക പ്രവർത്തകൻ കൂടിയായ ഇദ്ദേഹത്തിന്​ നിരവധി മലയാളി സുഹൃത്തുക്കളുണ്ട്​. അതുവഴി പ്രളയ ദുരന്തത്തി​​​െൻറ കരളലിയിക്കുന്ന കാഴ്​ചകൾ മീഡിയ വൺ ചാനലിൽ നിന്ന്​​ കാണാനിടയാവുകയും ചെയ്​തു​. 

അതൊക്കെ കണ്ടപ്പോൾ ഹൃദയം പിടഞ്ഞു. അപ്പോഴേ മനസിലുറപ്പിച്ചു, ദുരിതബാധിതർക്ക്​ ആവശ്യമായതെന്തും തനിക്ക്​ കഴിയുന്നത്ര​ വാങ്ങി അയച്ചുകൊടുക്കണമെന്ന്​. കേരളത്തിലെത്തിക്കാൻ പത്രം തന്നെ വഴിയൊരുക്കുന്നുണ്ടെന്ന്​ അറിഞ്ഞപ്പോൾ സമാധാനവുമായി. പത്രത്തിൽ പ്രസിദ്ധീകരിച്ച അറിയിപ്പിൽ നിന്ന്​ ലഭിച്ച ഫോൺ നമ്പറിൽ റിയാദ്​ ഒാഫീസിനെ ബന്ധപ്പെടുകയായിരുന്നു. 

മലയാളി സുഹൃത്തുക്കളുടെ സഹായം ഇതിന്​ ലഭിച്ചു. കേരളത്തിലേക്ക്​ ഇതാദ്യമായല്ല അദ്ദേഹം സഹായങ്ങൾ അയക്കുന്നത്​. റമദാനാവു​േമ്പാൾ ഇൗത്തപ്പഴങ്ങളും ഖുർആനുമെല്ലാം അയക്കുന്നത്​ പതിവാണ്​. പത്രം ഒാഫീസിലുള്ളവരെ സാധനങ്ങൾ ഏൽപിച്ച്​ മടങ്ങു​േമ്പാൾ ഇൗ ദുരന്തത്തിൽ നിന്ന്​ എത്രയും പെ​െട്ടന്ന്​ കരകയറാൻ കേരളജനതയെ അല്ലാഹു സഹായിക്ക​െട്ട എന്ന്​ പ്രാർഥിക്കാനും അദ്ദേഹം മറന്നില്ല.