ത്വാഇഫിലും അസീറിലും മഴ തുടരുന്നു

ത്വാഇഫ്​: ത്വാഇഫ്​, അസീർ​ മേഖലകളിൽ മഴ തുടരുന്നു. അസീർ മേഖലയുടെ പല ഭാഗങ്ങളിൽ മഴ തുടങ്ങിയിട്ട്​ അഞ്ച്​ ദിവസത്തിലേറെയായി​. അബ്​ഹ, ഖമീശ്​ മുശൈത്ത്​, നമാസ്​, തത്​ലീത്​, ബൽഖർന്​, തന്നൂമ, തുബൈബ്​ എന്നിവിങ്ങളിലും ഇൗ പ്രദേശങ്ങൾക്ക്​ കീഴിലെ മർക്കസുകളിലുമാണ്​ മഴയുണ്ടായത്​. താഴ്​വരകളിൽ വെള്ളം കവിഞ്ഞൊഴുകി. ഇന്നലെയും അബ്​ഹയിലും പരിസര പ്രദേശങ്ങളിലും നല്ല മഴ ലഭിച്ചു. 

അവശിഷ്​ടങ്ങൾ കുമിഞ്ഞു കൂടിയതിനാൽ പല സ്​ഥലങ്ങളിലും ഒാവുചാലുകളിലിലെ ഒഴുക്ക്​ തടസ്സപ്പെട്ടു. റോഡുകളിൽ വെള്ളക്കെട്ടുകൾ രൂപപ്പെടാൻ ഇതുകാരണമായി.  മഴവെള്ളം നീക്കം ചെയ്യാനും അഴുക്ക്​ചാലുകൾ നന്നാക്കാനും മുനിസിപ്പാലിറ്റി കൂടുതൽ തൊഴിലാളികളെ നിയോഗിക്കുകയും ആവശ്യമായ യന്ത്രസാമഗ്രികൾ ഒരുക്കുകയും ചെയ്​തിട്ടുണ്ട്​. ചില ഡാമുകളിലെ ജലനിരപ്പും ഉയർന്നിട്ടുണ്ട്​. ഖമീസ്​ മുശൈത്​, ബീശ റോഡുകളിൽ വെള്ളം കയറിയതിനാൽ ഗതാഗതം തടസ്സപ്പെട്ടു. ബീശക്ക്​ തെക്ക്​ മർകസ്​ സമഖ്​ ഭാഗത്തെ​ റോഡിലാണ്​ വെള്ളം കയറിയത്​. മഴമൂലം വീടുകൾക്ക്​ കേടുപാടുകൾ സംഭവിച്ചതായും റിപ്പോർട്ടുണ്ട്​. 

ത്വാഇഫിലും ഇന്നലെയും നല്ല മഴയുണ്ടായി. വാദി വിജ്​ൽ റോഡിൽ വെള്ളം കയറി ഗതാഗതം തടസ്സപ്പെട്ടു. ത്വാഇഫി​​​െൻറ പല ഭാഗങ്ങളിലും നല്ല മഴയാണ്​ ലഭിച്ചതെന്നും ആവശ്യമായ മുൻകരുതലെടുത്തതായും ത്വാഇഫ്​ സിവിൽ ഡിഫൻസ്​ വക്​താവ്​ കേണൽ നാസ്വിർ സുൽത്താൻ അൽശരീഫ്​ പറഞ്ഞു.  മക്കയിലും ഇന്നലെ വൈകുന്നേരം മഴപെയ്തു.മഴബാധിത പ്രദേശങ്ങളിലെ ​​​റോഡുകളിൽ കെട്ടി നിൽക്കുന്ന വെള്ളം നീക്കം ചെയ്യാനും ശുചീകരണത്തിനും രണ്ട്​ ഷിഫ്​റ്റുകളിലായി തൊഴിലാളി​കളെ നിയോഗിച്ചതായി ത്വാഇഫ്​ മുനിസിപ്പാലിറ്റി വക്​താവ്​ ഇസ്​മാഇൽ ഇബ്രാഹീം പറഞ്ഞു.