മക്കയുൾപ്പെടെ പടിഞ്ഞാറൻ മേഖലയിൽ മഴ തുടരുന്നു

ജിദ്ദ: മക്കയുൾപ്പെടെ പടിഞ്ഞാറൻ മേഖലയിൽ മഴ തുടരുന്നു. വെള്ളിയാഴ്​ച പുലർച്ചെ ഹറം പരിസരത്തും മക്കയുടെ വിവിധ ഭാഗങ്ങളിലും ഇടിയും കറ്റോടു കൂടി നല്ല മഴയാണുണ്ടായത്​. ചില ഡിസ്​ട്രിക്​റ്റുകളിൽ കനത്ത മഴയെ തുടർന്ന് റോഡുകളിലും റൗണ്ട്​ എബൗട്ടുകളിലും വെള്ളക്കെട്ടുണ്ടായി. വാഹനങ്ങൾക്ക്​ കേടുപാടുകൾ സംഭവിച്ചു. നിർത്തിയിട്ട ചില വാഹനങ്ങൾ മഴവെള്ള ഒഴുക്കിൽപ്പെട്ടു. മരങ്ങൾ കടപുഴകി വീണു. പല സ്ഥലങ്ങളിലും മാലിന്യപ്പെട്ടികൾ ഒലിച്ചുപോയി. ചില റോഡുകളിൽ ഗതാഗത നിയന്ത്രണമേർപ്പെടുത്തി. റോഡിന്​ നടുവിൽ വൻതോതിൽ വെള്ളം കെട്ടിക്കിടന്നതിനാൽ മുനിസിപ്പാലിറ്റിയും ട്രാഫികും മക്ക അൽശറായ ഹൈവേ ഒരു ഭാഗം അടച്ചു. വെള്ളം നീക്കം ചെയ്​തു ​റോഡ്​ വേഗം തുറന്നു കൊടുക്കാൻ മുനിസിപ്പാലിറ്റി വേണ്ട ഉപകരണങ്ങളും തൊഴിലാളികളെയും സ്ഥലത്ത്​ വിന്യസിച്ചു. പ്രധാന റോഡുകളിൽ സിവിൽ ഡിഫൻസ്​ സംഘങ്ങളും നിലയുറപ്പിച്ചിരുന്നു.

വെള്ളിയാഴ്​ച വൈകുന്നേരം ഏഴ്​ വരെ മക്ക മേഖലയിൽ കനത്ത മഴക്ക്​ സാധ്യതയുണ്ടെന്നും ദൂരക്കാഴ്​ച കുറയുകയും ചെയ്യുമെന്ന്​ കാലാവസ്ഥ കേന്ദ്രം മുന്നറിയിപ്പ്​ നൽകിയിരുന്നു. രാവിലെ മുതൽ ആകാശം മേഘാവൃതമായിരുന്നു. ബന്ധപ്പെട്ട വകുപ്പുകൾ വേണ്ട മുൻകരുതൽ എടുത്തിരുന്നു.​ വിമാന യാത്രക്കാരോട്​ യാത്രസമയത്തിൽ മാറ്റമുണ്ടോയെന്ന്​ ഉറപ്പുവരുത്താൻ വിമാനകമ്പനികളുമായി ആശയവിനിമയം നടത്താൻ ജിദ്ദ കിങ് അബ്ദുൽ അസീസ് വിമാനത്താവള അധികൃതർ ആവശ്യപ്പെട്ടു. ത്വാഇഫിലും നല്ല മഴയുണ്ടായി. കാലാവസ്ഥ വകുപ്പിന്റെ മുന്നറിയിപ്പിനെ തുടർന്ന്​ മുൻകരുതലായി തൽകാലത്തേക്ക്​ ത്വാഇഫിലെ അൽഹദാ ചുരം റോഡ്​ അടച്ചു​. മഴയെ തുടർന്ന്​ പ്രദേശത്ത്​​ തണുപ്പ്​ കൂടി​.

ജിദ്ദയുടെ ആകാശവും മൂടിക്കെട്ടിയ നിലയിരുന്നു. വ്യാഴാഴ്​ച രാവിലെയുണ്ടായ മഴക്ക്​ ശേഷം ആകാശം തെളിഞ്ഞിരുന്നുവെങ്കിലും വെള്ളിയാഴ്​ച പുലർച്ചെ ചില ഭാഗങ്ങളിൽ നേരിയ മഴയുണ്ടായി. ബുധനാഴ്​ച വൈകീട്ട് ​ കാലാവസ്ഥ കേന്ദ്രം ജിദ്ദയിൽ മഴയുണ്ടാകുമെന്ന്​ മുന്നറിയിപ്പ്​ നൽകിയിരുന്നു. ഇതേ തുടർന്ന്​ ബന്ധപ്പെട്ട വകുപ്പുകൾ വേണ്ട മുൻകരുതലെടുത്തിരുന്നു. സിവിൽ ഡിഫൻസ്​ ആളുകൾക്ക്​ ജാഗ്രത സന്ദേശം അയക്കുകയും ചെയ്​തിരുന്നു. മഴ തീരുന്നതുവരെ അത്യാവശ്യത്തിനല്ലാതെ വീടുകളിൽ നിന്ന് പുറത്തിറങ്ങരുതെന്നും ഒഴുക്കുള്ള സ്ഥലങ്ങളിലേക്ക്​ അടുക്കരുതെന്നും മക്ക മേഖലയിലെ ദുരന്ത നിവാരണ കേന്ദ്രം നിർദേശിച്ചു. സർക്കാർ, സ്വകാര്യ സ്​ക്കൂളുകൾക്ക്​ വ്യാഴാഴ്​ച അവധി നൽകിയിരുന്നു. മദീന, അൽവജ്​ഹ്​, തബൂക്ക്​ എന്നിവിടങ്ങളിലും വെള്ളിയാഴ്​ച മഴയുണ്ടായായി റിപ്പോർട്ടുണ്ട്​.