ഖുർആൻ മനഃപാഠ മത്സരം: ആയിരം പേരെ പിന്തള്ളി ഇന്ത്യൻ വിദ്യാർഥിക്ക്​ കിരീടം

ജിദ്ദ: സൗദിയിൽ നടന്ന ഖുർആൻ മനഃപാഠ മത്സരത്തിൽ ഒന്നാം സ്ഥാനം നേടി ഇന്ത്യൻ വിദ്യാർഥി. ഹൈദരാബാദ് സ്വദേശിയായ അബ്​ ദുല്ല അബ്​ദുൽ മത്തീൻ ഉസ്മാനിയാണ് ഉന്നത നേട്ടത്തിനു അർഹനായത്. വിവിധ രാജ്യങ്ങളിൽ നിന്നുള്ള ആയിരത്തോളം മത്സരാർഥികളെ പിന്തള്ളിയാണ്​ ഇന്ത്യൻ വിദ്യാർഥിയുടെ വിജയം. ഹൈദരാബാദ് സ്വദേശികളായ അബ്​ദുൽ മത്തീൻ ഉസ്മാനി-^സയിദ അസ്ഫിയ അൻവർ ദമ്പതികളുടെ മൂത്ത മകനാണ്​ അബ്​ദുല്ല അബ്​ദുൽ മത്തീൻ ഉസ്മാനി. ഇന്ത്യൻ പ്രവാസികളുടെ അഭിമാനമായിരിക്കുകയാണ് ഈ 19 കാരൻ. സൗദിയിലെ ജാമിഅഃതഹ്‌ഫീളുൽ ഖുർആൻ മക്ക മേഖല സംഘടിപ്പിച്ച ഖുർആൻ മനഃപാഠ മത്സരത്തിലാണ് ചരിത്രനേട്ടം കൊയ്​തത്​.

സൗദി അറേബ്യ, ഈജിപ്ത്, യമൻ, പാകിസ്ഥാൻ, ബംഗ്ലാദേശ്, ഇന്തോനേഷ്യ തുടങ്ങിയ രാജ്യങ്ങളിൽ നിന്നുള്ള 1000ത്തോളം വിദ്യാർഥികൾ പങ്കെടുത്ത മത്സരത്തിൽ13 പേരാണ്​ ഫൈനലിലെത്തിയത്​. കാറാണ് അബ്​ദുല്ലക്ക് സമ്മാനമായി ലഭിച്ചത്. ജിദ്ദയിൽ നടന്ന സമ്മാന ദാനച്ചടങ്ങിൽ ഗവർണർ അമീർ മിഷാൽബ്നു മാജിദ്​ കാറി​​​െൻറ താക്കോൽ കൈമാറി. സൗദി ഉന്നത ഉദ്യോഗസ്ഥരടക്കം നിരവധി പ്രമുഖർ ചടങ്ങിൽ സംബന്ധിച്ചു. രക്ഷിതാക്കളിൽ നിന്നുള്ള അകമഴിഞ്ഞ പ്രോത്സാഹനവും കഠിന പ്രയത്നവുമാണ് അബ്​ദുല്ലയുടെ നേട്ടത്തിന് നിദാനമായത്​. ഇൻറർനാഷനൽ ഇന്ത്യൻ സ്‌കൂൾ 12ാം ക്ലാസ് വിദ്യാർഥിയായിരുന്ന അബ്​ദുല്ലക്ക്​ സ്‌കൂളിൽ സ്വീകരണം ഒരുക്കി. സൗദിയിൽ നിന്നുതന്നെ ഉന്നത വിദ്യാഭ്യാസത്തോടൊപ്പം അറബി ഭാഷയിലും പ്രാവീണ്യം നേടി മുന്നോട്ടുപോവാനാണ് ഈ വിദ്യാർഥിയുടെ തീരുമാനം.