ജിദ്ദ, റിയാദ്​ പബ്ലിക്​ ബസ്​ സർവീസ്​ ചൊവ്വാഴ്​ച മുതൽ

ജിദ്ദ: ജിദ്ദ, റിയാദ്​ പട്ടണങ്ങളിലെ പുതിയ പബ്ലിക്​ ബസ്​ സർവീസ്​ ചൊവ്വാഴ്​ച ആരംഭിക്കും. ജിദ്ദയിൽ ജിദ്ദ മെട്രോ കമ്പനിയും റിയാദിൽ റിയാദ്​ പട്ടണ വികസന ഉന്നതാധികാര അതോറിറ്റിയുമായിരിക്കും സർവീസിന്​ മേൽനോട്ടം വഹിക്കുക. ഒരു സ്​റ്റേഷനിൽ നിന്ന്​ മറ്റൊരു സ്​റ്റേഷനിലേക്ക്​ ചാർജ്​​ മൂന്ന്​ റിയാലായിരിക്കും. പട്ടണങ്ങളിലെ നിലവിലെ മിനി ബസ്​ സർവീസിന്​ പകരം മികച്ച രീതിയിൽ ​പൊതുഗതാഗത സംവിധാനം ഒരുക്കണമെന്ന മന്ത്രി സഭാ തീരുമാനത്തെ തുടർന്നാണിത്​. 
ഇക്കാര്യം പഠിക്കുന്നതിന് ഉന്നതാധികാര സമിതി​യെ നിയോഗിക്കുകയും ചെയ്​തിരുന്നു.

ഇൗ സമിതിയാണ്​ പുതിയ ബസ്​ സർവീസിന്​ പച്ചക്കൊടി കാട്ടിയത്​​. കഴിഞ്ഞവർഷം ഒക്​ടോബർ 31 നാണ്​ സൗദി മന്ത്രി സഭ ജിദ്ദ, റിയാദ്​ പട്ടണങ്ങളിൽ നിലവിലെ മിനി ബസ്​ സർവീസ്​ നിർത്തലാക്കാനും പകരം പുതിയ സർവീസ്​ ആരംഭിക്കാനും തീരുമാനമെടുത്തത്​. തീരുമാനം നടപ്പാക്കുന്നതിന്​ മുമ്പായി സമിതി വിഷയം പഠിക്കുകയും മിനി ബസുകളുടെയും ജോലിക്കാരുടെയും കണക്കെടുക്കുകയും ഉടമകളുടെ സാമൂഹിക,  സാമ്പത്തിക അവസ്​ഥ മനസ്സിലാക്കുകയും ചെയ്​തിരുന്നു. 
നിലവിലെ മിനി ബസ്​ ഡ്രൈവർമാർക്ക്​ പുതിയ ബസുകളിൽ ജോലി നൽകുന്ന കാര്യവും പരിഗണയിലുണ്ട്​.