പ്രവാസി ക്ഷേമ ബോർഡ്​ പ്രവർത്തനം കാര്യക്ഷമമാക്കും -ജോർജ്​ വർഗീസ്​

ദമ്മാം: കേരള പ്രവാസി ക്ഷേമ ബോർഡ് കൂടുതൽ ക്രിയാത്​മകമായി പ്രവർത്തിക്കുമെന്ന് ഡയറക്​ടർ ബോർഡ് അംഗമായി നിയമിതനായ ജോർജ് വർഗീസ്​. കഴിഞ്ഞ അഞ്ചു വർഷം അനാസ്​ഥ കാരണം ഭൂരിപക്ഷം പ്രവാസികളും ക്ഷേമ ബോർഡ് നൽകി വരുന്ന ആനുകൂല്യങ്ങളെ കുറിച്ച്​ അറിഞ്ഞില്ല. അത്​ പരിഹരിക്കാൻ പ്രവാസി സംഘടനകളൂടെ സഹകരണത്തോടെ പ്രചരണ കാമ്പയിൻ സംഘടിപ്പിക്കുമെന്നും ദമ്മാമിൽ വാർത്തസമ്മേളനത്തിൽ ജോർജ് പറഞ്ഞു.2010 ൽ രൂപീകൃതമായ ശേഷം ആദ്യമായി പ്രവാസി പെൻഷൻ 1000 രൂപയിൽനിന്നും 2000 രൂപയാക്കിയിട്ടുണ്ട്​. വിവിധ കാരണങ്ങളാൽ അംശാദായം അടക്കാൻ കഴിയാത്തവർക്കും, അടവിൽ പിഴവ്​ വരുത്തിയവർക്കും പിഴയും പലിശയും ഒഴിവാക്കി കുടിശ്ശികാനിവാരണം വരുത്താൻ 2017 സെപ്റ്റംബർ മുതൽ 2018 ഫെബ്രുവരി വരെയുള്ള 6 മാസം അനുവദിച്ചിട്ടുണ്ട്.

അംശാദായം അടവിൽ കുടിശ്ശിക വരുത്തിയ 60 വയസ്സ് കഴിഞ്ഞവർക്ക് അംശാദായവും പിഴയും പലിശയും അടച്ച് അംഗത്വം പുനഃസ്​ഥാപിച്ച് പെൻഷൻ അനുവദിച്ചു. വർധിച്ച പെൻഷൻ സെപ്റ്റംബർ മാസം മുതൽ വിതരണം ചെയ്തു തുടങ്ങിയിട്ടുണ്ട്​. മരണാനന്തര സഹായം  ഏകീകരിക്കുകയും 50,000  രൂപയിൽനിന്ന് ഒരു ലക്ഷം രൂപയായി വർധിപ്പിക്കുകയും ചെയ്തു. രജിസ്​േട്രഷൻ, ക്ഷേമനിധി അംഗത്വവും കാർഡും, അംശാദായ അടവ് എന്നിവ പൂർണമായും ഓൺലൈൻ വഴിയാക്കി. പ്രവാസിക്ക് ലോകത്തി​െൻറ ഏത് ഭാഗത്തുനിന്നും ഈ കാര്യങ്ങൾ ചെയ്യുന്നതിനും നില നിന്നിരുന്ന കാലതാമസം ഒഴിവാക്കാനും ഇതോടെ സാധിക്കും എന്നാണ് കരുതുന്നത്. കഴിഞ്ഞ സംസ്​ഥാന ബജറ്റിൽ ആറ് കോടി രൂപയാണ്  പ്രവാസി ക്ഷേമ പ്രവർത്തനങ്ങൾക്കായി വക കൊള്ളിച്ചത്.വിദേശത്ത് താമസിക്കുന്ന ​​പ്രവാസികളുടെ  അടവിന് ആനുപാതികമായി പെൻഷൻ 3000 രൂപയാക്കി വർധിപ്പിക്കാനും, 60 വയസ്സ് കഴിഞ്ഞ പ്രവാസികൾക്ക് ക്ഷേമനിധിയിൽ അംഗമാകുന്നതിനും പെൻഷൻ ലഭിക്കുന്നതിനും നടപടി സ്വീകരിക്കാനും ശുപാർശ ചെയ്തിട്ടുണ്ട് എന്നും അദ്ദേഹം അറിയിച്ചു.