വിദേശികള്‍ നാട്ടിലേക്കയച്ച  പണത്തിൽ 7.55 ശതമാനം കുറവ്

റിയാദ്: സൗദിയിലെ വിദേശികള്‍ നാട്ടിലേക്കയച്ച പണത്തിൽ ഗണ്യമായ കുറവ് വന്നതായി സാമ്പത്തിക റിപ്പോര്‍ട്ടുകള്‍ വ്യക്തമാക്കി. 13 വര്‍ഷത്തിനിടെ ഏറ്റവും കുറഞ്ഞ പണമാണ്​ 2017 ലെ ആദ്യ എട്ട് മാസത്തെ കണക്കുകൾ വ്യക്​തമാക്കുന്നത്​ . 2016ല്‍ ഇതേ കാലയളവില്‍ അയച്ചതിനേക്കാള്‍ 7.7 ബില്യൻ റിയാല്‍ കുറവാണ് വിദേശത്തേക്കയച്ച പണം. 2016 ആദ്യത്തെ എട്ട് മാസത്തിനിടക്ക് 102.59 ബില്യന്‍ റിയാൽ വിദേശികള്‍ നാട്ടിലേക്കയച്ചപ്പോള്‍ 2017^ലെ എട്ട് മാസത്തിനിടക്കുള്ള സംഖ്യ 94.84 ബില്യന്‍  മാത്രമാണ്. 

2015ന് ശേഷമാണ് വിദേശികള്‍ നാട്ടിലേക്കയക്കുന്ന പണത്തിൽ കുറവ് അനുഭവപ്പെട്ടു തുടങ്ങിയത്. 2015ല്‍ 157 ബില്യന്‍  നാട്ടിലേക്കയച്ചിരുന്നു. 
എന്നാല്‍ 2016ല്‍ ഇത് 151.89 ബില്യനായി കുറഞ്ഞു. 2017 ജൂണ്‍ മാസത്തില്‍ വിദേശ ട്രാന്‍സ്​ഫറില്‍ റെക്കോര്‍ഡ് കുറവ് അനുഭവപ്പെട്ടതായി റിപ്പോര്‍ട്ടില്‍ പറയുന്നു. മുന്‍ മാസങ്ങളെ അപേക്ഷിച്ച 20 ശതമാനം കുറവ് ജൂണില്‍ അനുഭവപ്പെട്ടു. 

ആഗസ്​റ്റില്‍ ഇത് വീണ്ടും കുറഞ്ഞു. അതേസമയം 2016 ആഗസ്​റ്റിനെ അപേക്ഷിച്ച് 2.3 ശതമാനം കുറവാണ് 2017 ആഗസ്​റ്റിലെ കണക്ക്​. വിദേശികളുടെ എണ്ണത്തിലും വരുമാനത്തിലും കുറവു വന്നതും സൗദിയില്‍ ചെലവഴിക്കുന്ന പണത്തിൽ വര്‍ധനവ് വന്നതും ഈ പ്രവണതക്ക് കാരണമായിട്ടുണ്ടാവുമെന്നാണ് വിദഗ്ധരുടെ വിലയിരുത്തല്‍. നടപ്പുവര്‍ഷത്തെ കഴിഞ്ഞ എട്ടുമാസത്തെ അനുപാതമനുസരിച്ച് വിദേശ ട്രാന്‍സ്ഫര്‍ 142 ബില്യനില്‍ കൂടാന്‍ സാധ്യതയില്ല.