ആഗോള ദാരിദ്ര്യത്തിനെതിരെ പോരാട്ടം തുടരും

റിയാദ്​: ​ആഗോളതലത്തിൽ ദാരിദ്ര്യത്തിന്​ എതിരെ പോരാട്ടം തുടരുകയാണെന്ന്​ സൗദി അറേബ്യ. ന്യൂയോർക്കിൽ 73ാമത്​ യു.എൻ പൊതുസഭയിൽ ദാരിദ്ര്യനിർമാർജനവും ഇതര വികസന പ്രശ്​നങ്ങളും സംബന്ധിച്ച്​ നടന്ന ചർച്ചയിൽ സൗദി വിദേശകാര്യമന്ത്രാലയ ഉപദേഷ്​ടാവും യു.എന്നിലെ സ്ഥിരം പ്രതിനിധിയുമായ നബീൽ ബിൻ മുഹമ്മദ്​ അൽസാലെഹ്​ വ്യക്​തമാക്കിയതാണ്​ ഇക്കാര്യം​. സാമൂഹികപ്രതിബദ്ധതയും മാനവികമൂല്യങ്ങളും ഉയർത്തിപ്പിടിച്ചാണ്​ആഭ്യന്തര, ആഗോളതലങ്ങളിൽ ദാരിദ്ര്യനിർമാർജനത്തിന്​ വേണ്ടി സൗദി അറേബ്യ നിരന്തര പോരാട്ടം നടത്തുന്നതും ഇൗ മേഖലയിൽ പ്രവർത്തിക്കുന്ന അന്താരാഷ്​ട്ര സംഘടനകൾക്ക്​ ഉറച്ച പിന്തുണ നൽകുന്നതെന്നും അദ്ദേഹം പറഞ്ഞു. ദരിദ്രരാജ്യങ്ങളിലേയും വികസര രാജ്യങ്ങളിലേയും ജനങ്ങൾക്ക്​ സഹായമെത്തിക്കുന്നു. വികസര രാജ്യങ്ങളിലെ സാമ്പത്തിക ഞെരുക്കവും സാമൂഹിക വെല്ലുവിളികളും നേരിടാൻ അന്താരാഷ്​ട്ര സഹകരണം ആവശ്യമാണെന്നും അതിദാരിദ്ര്യം ഇല്ലായ്​മ ചെയ്യാനും സാമൂഹിക രാഷ്​ട്രീയ അടിയന്തര സാഹചര്യങ്ങളും പ്രകൃതിദുരന്തങ്ങളും മൂലം ദുരിതത്തിനിരയാകുന്ന ജനങ്ങളെ സഹായിക്കാനും ആവശ്യമായ പ്രവർത്തനങ്ങളും പിന്തുണയുമാണ്​ വേണ്ടതെന്നും അൽസാലെഹ്​ കൂട്ടിച്ചേർത്തു.

ഇത്തരം സന്ദർഭങ്ങളിൽ ആദ്യം ഇടപെടുകയും ഉടനടി പരിഹാരശ്രമത്തിന്​ മുൻകൈയ്യെടുക്കുകയും ചെയ്യുന്ന രാജ്യങ്ങളിലൊന്നാണ്​ സൗദി അറേബ്യ.
ലോകത്തൊട്ടാകെയുള്ള മുഴുവൻ ജനങ്ങളും ഇൗ രാജ്യത്തി​​​​െൻറ മാനവിക പരിഗണനയിലാണ്​. ആഗോള ഭക്ഷ്യസുരക്ഷ, ജലലഭ്യത, പൊതുശുചിത്വ പരിപാലനം, പോഷകാഹാര ലഭ്യത, പൊതുജനാരോഗ്യം, വിദ്യാഭ്യാസം, സാമൂഹിക ഭദ്രത, വിവിധ മാനവിക വിഷയങ്ങൾ എന്നീ ആവശ്യങ്ങൾക്കുള്ള വിവിധ പദ്ധതികൾക്കായി ദരിദ്രരാജ്യങ്ങൾക്കിടയിൽ കിങ്​ സൽമാൻ ഹ്യുമാനിറ്റേറിയൻ എയ്​ഡ്​ ആൻഡ്​ റിലീഫ്​ സ​​​െൻറർ (കെ.എസ്​ റിലീഫ്​ സ​​​െൻറർ) നൂറ്​ കോടി 800 ദശലക്ഷം ഡോളറാണ്​ ചെലവഴിക്കുന്നത്​. ഇൗ ആവശ്യങ്ങൾക്കായി 80 അന്താരാഷ്​ട്ര സംഘടനകളുടെ സഹകരണത്തോടെ 269 പ്രോജക്​ടുകളാണ്​ നടപ്പാക്കുന്നത്​. യമൻ, സിറിയ, സോമാലിയ എന്നീ രാജ്യങ്ങളും മ്യാന്മറിലേയും ബംഗ്ലാദേശിലേയും റോഹിങ്ക്യൻ അഭയാർഥികളുമാണ്​ ഇൗ പദ്ധതികളുടെ പ്രധാന ഗുണഭോക്താക്കൾ. ദാരിദ്ര്യ പ്രശ്​നങ്ങളെ അഭിമുഖീകരിക്കാൻ ഇസ്​ലാമിക്​ ഡവലപ്​മ​​​െൻറ്​ ബാങ്കി​​​​െൻറ പിന്തുണയോടെ രൂപവത്​കരിച്ച നിധിയിലേക്ക്​ സൗദി അറേബ്യ പുതുതായും​ നൂറ്​ കോടി ഡോളർ സംഭാവന ചെയ്​തിട്ടുണ്ടെന്നും അൽസാലെഹ്​ വിശദീകരിച്ചു. കഴിഞ്ഞ മൂന്നു പതിറ്റാണ്ടിനിടയിൽ സൗദി അറേബ്യ ഇങ്ങനെ സംഭാവനയായും വികസന സഹായമായും ചെലവഴിച്ചത്​ 100 ശതകോടിയാണ്​.