യാഥാർഥ്യമായത്​​ മധ്യപൗരസ്​ത്യമേഖലയിലെ ഏറ്റവും വലിയ പൊതുഗതാഗത പദ്ധതി

ജിദ്ദ: ഹറ​മൈൻ എക്​സ്​പ്രസ്​ ട്രെയിൻ സർവീസ്​ സൽമാൻ രാജാവ്​ ഉദ്​ഘാടനം ചെയ്​തതോടെ യാഥാർഥ്യമായത്​ ​ മധ്യപൗരസ്​ത്യദേശത്തെ ഏറ്റവും വലിയ പൊതുഗതാഗത പദ്ധതി. പൊതുഗതാഗത രംഗത്ത്​ സൗദി ഭരണകൂടം വിവിധ വൻകിട പദ്ധതികൾ ആസൂത്രണം ചെയ്​തു നടപ്പാക്കിവരുന്നുണ്ടെങ്കിലും രാജ്യത്തെ പശ്​ചിമ മേഖലയിൽ നടപ്പാക്കിയ ഏറ്റവും​ ഭീമൻ പദ്ധതിയായിട്ടാണ്​ ഇതിനെ കണക്കാക്കുന്നത്​. അതോടൊപ്പം രാജ്യത്തെ ആദ്യ എക്​സ്​പ്രസ്​ ട്രെയിൻ സർവീസുമാണ്​. പടിഞ്ഞാറൻ മേഖലയിലെ സ്വദേശികളും വിദേശികളുമായവരുടെ ചിരകാലാഭിലാഷമാണ്​ ഇതോടെ സാക്ഷാത്​കരിക്കപ്പെട്ടത്​.

തീർഥാടന ചരിത്രത്തിലെ ഒരു നാഴിക്കല്ലായാണ്​ ഇരുഹറമുകളുടെ ബന്ധിപ്പിക്കുന്ന ഹറമൈൻ റെയിൽവേ പദ്ധതിയെ വിശേഷിപ്പിക്കുന്നത് തന്നെ​. മക്ക, ജിദ്ദ, മദീന പട്ടണങ്ങൾക്കിടയിൽ സ്വദേശികൾക്കും വിദേശികൾക്കും മാത്രമല്ല, ലക്ഷക്കണക്കിന്​ ഹജ്ജ്​ ഉംറ യാത്രക്കാർക്കും ഉപകാരപ്പെടുന്ന പദ്ധതിയാണിത്​. യാത്ര രംഗത്തെ പ്രയാസങ്ങളും റോഡുകളിലെ തിരക്കും മലിനീകരണം കുറക്കാനും കുറഞ്ഞ സമയത്തിനുള്ളിൽ ലക്ഷ്യസ്​ഥാനത്തെത്തുവാനും ഇതോടെ സാധിക്കും. അതോടൊപ്പം മേഖലയുടെ സാമ്പത്തിക വളർച്ചക്കും വികസനത്തിനും ഏറെ ഉപകരിക്കും. 2011ലാണ്​ 450 കിലോ മീറ്റർ നീളം വരുന്ന അൽഹറമൈൻ റെയിൽവേ പദ്ധതിയുടെ നിർമാണ ജോലികൾ ആരംഭിച്ചത്​. മൂന്ന്​ ഘട്ടങ്ങളിലായി ശതകോടികൾ ചെലവഴിച്ചാണ്​ അഞ്ച്​ റെയിൽവേ സ്​റ്റേഷനുകളോട്​ കൂടിയ റെയിൽവേ പദ്ധതി സൗദി ഭരണകൂടം പൂർത്തിയാക്കിയത്​. ഒരു വർഷംമുമ്പ്​​ ട്രെയിനുകളുടെ പരീക്ഷണ ഒാട്ടം ആരംഭിച്ചിരുന്നു​​.
മദീനക്കും കിങ്​ അബ്​ദുല്ല സിറ്റിക്കുമിടയിലാണ്​ ആദ്യ പരീക്ഷണ ഒാട്ടം നടന്നത്​. ​

നിർമാണ ജോലികൾ പൂർത്തിയാകുന്നതിന്​ അനുസരിച്ച്​ ജിദ്ദയിലേക്കും പിന്നീട്​ ജിദ്ദക്കും മക്കക്കും ഇടയിലും പരീക്ഷണം ഒാട്ടം തുടങ്ങി. സ്വദേശികൾക്ക്​ മാത്രമായി വരാന്ത്യഅവധി ദിവസങ്ങളിൽ മക്കക്കും മദീനക്കുമിടയിൽ സൗജന്യ സർവീസുകളും നടത്തി. ഒക്​ടോബർ നാല്​ മുതൽ ട്രെയിനുകൾ യാത്രക്കാരെയും വഹിച്ചു മക്കക്കും മദീനക്കുമിടയിൽ ചീറിപ്പായും​. ലോകത്തെ ഏറ്റവും നൂതനമായ ട്രെയിനുകളാണ്​ സർവീസ്​ നടത്താൻ ഇറക്കുമതി ചെയ്​തിരിക്കുന്നത്​. കൺട്രോൾ, സിഗ്​നൽ, ടിക്കറ്റിങ്​ രംഗത്ത്​ ഉയർന്ന സാ​​​​േങ്കതിക സംവിധാനങ്ങളുമാണ്​ ഒരുക്കിയിരിക്കുന്നത്​. ട്രെയിൻ പ്രവർത്തിപ്പിക്കുന്നതിനായി 3000ത്തികമാളുകളും രംഗത്തുണ്ട്​. സ്വദേശികളാണ്​ ഇവരിൽ ഭൂരിഭാഗമാളുകളെന്ന പ്രത്യേക കൂടിയുണ്ട്​. ആരംഭത്തിൽ സർവീസുകളുടെ എണ്ണം കുറയു​മെങ്കിലും ക്രമേണ കൂട്ടാനാണ്​ പദ്ധതി. 35 ഒാളം ട്രെയിനുകളുണ്ട്​. മുഴുവൻ ട്രെയിനുകളും പ്രവർത്തിപ്പിക്കുന്നതോടെ ഒരു ദിവസം 1,60,000 പേർക്കും വർഷത്തിൽ ഏകദേശം 60 ദശലക്ഷം പേർക്കും യാത്ര ചെയ്യാനാകുമെന്നാണ്​ ​സൗദി റെയിൽവേയുടെ കണക്ക്​ കൂട്ടൽ.