തീർഥാടകർ ഇൻഫ്ലുവൻസ വാക്സിനെടുക്കണം, മാസ്ക് ധരിക്കണം

മക്ക: കാലാവസ്ഥ മാറ്റവും തണുപ്പും അനുഭവപ്പെടുന്ന ഈ സമയത്ത് മക്കയിലെത്തുന്ന തീർഥാടകർ സീസണൽ ഇൻഫ്ലുവൻസ വാക്സിൻ എടുക്കണമെന്ന് ഇരുഹറം കാര്യാലയ ജനറൽ അതോറിറ്റി ആവശ്യപ്പെട്ടു. ഇരുഹറമിലെത്തുന്ന സന്ദർശകരെ സംരക്ഷിക്കുന്നതിനും തീർഥാടകർക്കും ഉംറ സഹായികൾക്കും സീസണൽ രോഗങ്ങൾ പടരുന്നത് തടയുന്നതിനുള്ള ശ്രമങ്ങളുടെ ഭാഗമാണിത്.

ഹറമുകളിലെത്തുന്നവർ മാസ്‌ക് ധരിക്കണം. ഇത്​ സംബന്ധിച്ച ബോധവത്കരണ പോസ്​റ്റ്​ അതോറിറ്റി പുറത്തിറക്കി. സാംക്രമിക രോഗങ്ങൾ തടയുന്നതിനും അണുബാധയുടെ വ്യാപനം തടയുന്നതിനും ലക്ഷ്യമിട്ടുള്ള പ്രതിരോധ നടപടികളിൽ ഇത് ഉൾപ്പെടുന്നതായി അതോറിറ്റി സൂചിപ്പിച്ചു.