പരോളിലിറങ്ങിയ പ്രതി ലക്ഷം റിയാലി​െൻറ ആഭരണവും ആയുധവും മോഷ്​ടിച്ചു

അറാർ: കളവുകേസില്‍ തടവുശിക്ഷ അനുഭവിക്കുന്ന പ്രതി പരോളിലിറങ്ങി ലക്ഷം റിയാല്‍ വിലയുള്ള സ്വര്‍ണാഭരണങ്ങളും തോക്കും മൊബൈല്‍ ഫോണും മോഷ്ടിച്ചു. സൗദി വടക്കന്‍ അതിര്‍ത്തി മേഖലയിലെ അര്‍അര്‍ ജയിലില്‍ നിന്ന് കുടുംബത്തെ സന്ദര്‍ശിക്കാന്‍ പരോളില്‍ ഇറങ്ങിയ പ്രതിയാണ് സ്വദേശിയുടെ വീട് കുത്തിത്തുറന്ന് കളവു നടത്തിയത്.

60 വയസ്സുള്ള സ്വദേശിയും കുടുംബവും പുറത്തുപോയ സമയത്താണ് വീടി​െൻറ  വാതിലുകള്‍ കുത്തിത്തുറന്ന് മോഷണം നടത്തിയതെന്ന് അന്വേഷണത്തില്‍ വ്യക്തമായതായി പോലിസ് വക്താവ് ഉവൈദ് മഹ്ദി പറഞ്ഞു. 40 വയസ്സുള്ള പ്രതി മുമ്പ് നടത്തിയ കളവുകേസില്‍ തടവ് അനുഭവിക്കുന്നതിനിടെയാണ് 24 മണിക്കൂര്‍ നേരത്തെ പരോളില്‍ ഇറങ്ങിയത്. 
പ്രതിയെ തിരിച്ചറിഞ്ഞതിനാല്‍ വീണ്ടും പിടികൂടി ജയിലിലടച്ചതായും പോലിസ് വക്താവ് കൂട്ടിച്ചേര്‍ത്തു.