പാലത്തായി പീഡനം: ബി.ജെ.പി നേതാവിനെ രക്ഷപ്പെടുത്താന്‍ സര്‍ക്കാര്‍ ഒത്തുകളിക്കുന്നു -പ്രവാസി

റിയാദ്: പാലത്തായിയിൽ ബാലികയെ പീഡിപ്പിച്ച കേസിൽ പോക്സോ ചുമത്താതെ ജുവനൈൽ ജസ്​റ്റീസ് ആക്ടിലെ നിസ്സാര വകുപ്പുകൾ മാത്രം ചേർത്ത് ക്രൈംബ്രാഞ്ച് കുറ്റപത്രം സമർപ്പിക്കുക വഴി പ്രതിയായ ബി.ജെ.പി നേതാവ് പത്മരാജനും ഇനിയും അറസ്​റ്റ്​ ചെയ്യപ്പെടാത്ത കൂട്ടുപ്രതികൾക്കും രക്ഷപ്പെടാനുള്ള പഴുതൊരുക്കുകയാണ് കേരള സർക്കാറെന്ന് പ്രവാസി സാംസ്കാരിക വേദി റിയാദ് ഘടകം സംഘടിപ്പിച്ച വെര്‍ച്വല്‍ പ്രതിഷേധ സംഗമം അഭിപ്രായപ്പെട്ടു. 

കുറ്റപത്രം സമര്‍പ്പിക്കാതെ 90 ദിവസം തികഞ്ഞ് പ്രതിക്ക് സ്വാഭാവിക ജാമ്യം നേടിക്കൊടുക്കാനുള്ള ക്രൈംബ്രാഞ്ചി​​െൻറ ശ്രമം ശക്തമായ ജനകീയ പ്രതിഷേധത്തിന് മുന്നില്‍ പരാജയപ്പെടുകയായിരുന്നു. എന്നാല്‍ ദുര്‍ബലമായ കുറ്റങ്ങള്‍ ചുമത്തി തട്ടിക്കൂട്ട് കുറ്റപത്രം സമര്‍പ്പിച്ചിരിക്കുകയാണിപ്പോള്‍. കുട്ടിയുടെ മൊഴിക്കനുസരിച്ച് കൂട്ടുപ്രതിയെക്കുറിച്ച് വിവരം ലഭിച്ചിട്ടും അറസ്​റ്റ്​ ചെയ്യാന്‍ പൊലീസ് തയാറായിട്ടില്ല. 

പിണറായി സര്‍ക്കാറിനും സംഘ്പരിവാറിനുമിടയില്‍ എന്ത് ധാരണയാണ് പിഞ്ചുകുഞ്ഞിനെ പീഡിപ്പിച്ചവരെ  രക്ഷപ്പെടുത്താനായി ഉണ്ടാക്കിയിട്ടുള്ളതെന്നതിന് മുഖ്യമന്ത്രി മറുപടി പറയണം. 

പ്രവാസി പ്രോവിന്‍സ് സെന്‍ട്രല്‍ കമ്മിറ്റി ജനറൽ സെക്രട്ടറി ഖലീൽ പാലോട് പ്രതിഷേധ പരിപാടി  ഉദ്ഘാടനം ചെയ്തു. റഹ്​മത്ത് തിരുത്തിയാട് അധ്യക്ഷത വഹിച്ചു. കെ.എം.സി.സി പ്രതിനിധി സത്താര്‍ താമരത്ത്, മാധ്യമപ്രവർത്തകൻ ജയൻ കൊടുങ്ങല്ലൂർ, പ്രവാസി  കേന്ദ്ര കമ്മിറ്റി അംഗങ്ങളായ അഡ്വ. റജി, സമീഉല്ല എന്നിവര്‍ സംസാരിച്ചു. അഷ്​റഫ് കൊടിഞ്ഞി സ്വാഗതവും അബ്​ദുറഹ്​മാൻ ഒലയാൻ നന്ദിയും പറഞ്ഞു.