‘സംസ്​കാരങ്ങളുടെ കൂടിച്ചേരൽ’ പെയിൻറിങ്​ പ്രദർശനം ജിദ്ദയിൽ തുടങ്ങി

ജിദ്ദ: ‘സംസ്​കാരങ്ങളുടെ കൂടിച്ചേരൽ’ എന്ന തലക്കെട്ടിൽ ആറാമത് പെയിൻറിങ്​ പ്രദർശനം ജിദ്ദയിൽ തുടങ്ങി. സൗദി ഫൈൻ ആർട്​സ്​ സ​​െൻററി​ലൊരുക്കിയ പ്രദർശനം ജിദ്ദ കലാ സാംസ്​കാരിക സൊസൈറ്റി ഡയറക്​ടർ മുഹമ്മദ്​ അൽസബീഹ്​ ഉദ്​ഘാടനം ചെയ്​തു. സൗദിക്ക്​ പുറമെ കുവൈത്ത്​, യമൻ,​ ജോർഡൻ, റഷ്യ, മെക്​സികോ, സ്​പെയിൻ, ബോസ്​നിയ, ചൈന, ഇൗജിപ്​ത്​, ഇന്തോനോഷ്യ, കെനിയ എന്നീ രാജ്യങ്ങളിലെ 17 വനിത ചി​ത്രകലാകാരികളുടെ വൈവിധ്യമാർന്നതും പുതുമ നിറഞ്ഞതുമായ കളർപെയിൻറിങുകളാണ്​ പ്രദർശനത്തിലുള്ളത്​.

ഏഴ്​ ദിവസം നീണ്ടു നിൽക്കും. വിവിധ സംസ്​കാരങ്ങൾ പരിചയപ്പെടുത്തലും കൈമാറലും സമാധാന സന്ദേശവുമാണ്​ ​പ്രദർശനത്തിലൂടെ ലക്ഷ്യമിടുന്നതെന്ന്​​ സംഘാടകർ വ്യക്​തമാക്കി. ജിദ്ദയിൽ കളർ പെയിൻറിങിൽ കഴിവുള്ള ധാരാളം കലാകാരന്മാരുണ്ടെന്നും അതിനാലാണ്​ ഇവിടെ പ്രദർശനമൊരുക്കിയതെന്നും പ്രദർശന മേധാവി ഉലയാ ദഖ്​സ്​ പറഞ്ഞു. അടുത്ത പ്രദർശനം ദുബൈ, റിയാദ്​, ജോർഡൻ എന്നിവിടങ്ങളിലായിരിക്കുമെന്നും പറഞ്ഞു.