ഹജ്ജ് 2021​; വിദേശ തീർഥാടകർക്ക്​ ക്വാറൻറീനും പി.സി.ആർ പരിശോധനയും വേണ്ടിവരും

ജിദ്ദ: വിദേശ ഹജ്ജ്​ തീർഥാടകർക്ക്​ ക്വാറൻറീനും പി.സി.ആർ പരിശോധനയും വേണ്ടിവരും. അടുത്ത ഹജ്ജ്​ വേളയിൽ തീർഥാടകർക്കിടയിൽ​ നടപ്പാക്കാൻ പോകുന്ന ആരോഗ്യ മുൻകരുതൽ നടപടികളിലും വ്യവസ്ഥകളിലുമാണ് ഇക്കാര്യം പറഞ്ഞിരിക്കുന്നത്​. ബന്ധപ്പെട്ട മന്ത്രാലയ വൃത്തങ്ങളെ ഉദ്ധരിച്ച്​ പ്രാദേശിക പത്രമാണ്​ ഹജ്ജ്​ സീസണിലെ തീർഥാടകരുടെ യാത്ര, താമസം, അറഫ, മുസ്​ദലിഫ, ജംറയിലെ കല്ലേറ്​എന്നിവക്ക്​ നിശ്ചയിച്ച മുൻകരുതൽ നടപടികളും വ്യവസ്ഥകളും പുറത്തുവിട്ടത്​. ഏറ്റവും പ്രധാനപ്പെട്ടത് 10 വ്യവസ്ഥകളാണ്.

ഹജ്ജ്​ സീസണിന്റെ 14 ദിവസം മുമ്പെങ്കിലും ഹജ്ജ്​ വേളയിലെ മുഴുവൻ തൊഴിലാളികളും കോവിഡ്​ പ്രതിരോധ കുത്തി​വെപ്പെടുത്തിരിക്കണം. വിദേശ തീർഥാടകരെത്തുന്ന സമയത്ത്​ മൂന്ന്​ ദിവസത്തെ ക്വാറൻറീനു വേണ്ട താമസ സൗകര്യം മുത്വവ്വഫ്​ ഒരുക്കിയിരിക്കണം. പി.സി.ആർ പരിശോധന നടത്തണം. തീർഥാടകൻ ഹറമുകളിലേക്ക്​ പ്രവേശിക്കുന്ന സമയത്ത്​ ഹജ്ജ്​ നിർവഹിക്കാനുള്ള അംഗീകൃത അനുമതി പത്രം കാണിച്ചിരിക്കണം. മക്കയിലും മദീനയിലും തീർഥാടകർക്ക്​ ആരോഗ്യ നിബന്ധനകൾ പാലിച്ചുള്ള താമസ സൗകര്യമേർപ്പെടുത്തണം. റൂമുകൾക്കുള്ളിൽ ആളുകൾ ഒരുമിച്ച്​ കൂടുന്നതും ഓപ്പൺ ബൂഫിയയും നിരോധിക്കണം. ഭക്ഷണ ഹാളുകളിൽ ആളുകൾ കൂടിയിരിക്കുന്നതും ഇരുഹറമുകളിലേക്ക്​ ഭക്ഷണം കൊണ്ടുവരുന്നതും തടയണം.

തീർഥാടകരെ രാജ്യത്തെ പ്രവേശന കവാടങ്ങളിൽ നിന്ന്​ ​നിശ്ചിത പാതയിലൂടെ കൊണ്ടുവരുമ്പോൾ ആരോഗ്യ മുൻകരുൽ നടപടികൾ പാലിച്ചിരിക്കണം. ചെറിയ സംഘങ്ങളായാണ്​​ തീർഥാടകരെ കൊണ്ടു വ​രേണ്ടത്​. തമ്പുകളും പരിശോധന സ്​ഥലങ്ങളും നവീകരിച്ചിക്കണം. തീർഥാടകരുടെ ബാഗുകൾ, അവ കൊണ്ടുപോകുന്ന വാഹനങ്ങൾ എന്നിവ പതിവായി അണുമുക്തമാക്കിയിരിക്കണം. പോക്കുവരവുകൾ വ്യവസ്ഥാപിതമാക്കാൻ സെക്യൂരിറ്റി ഉദ്യോഗസ്ഥരെ നിശ്ചയിക്കണം. അറഫയിലേക്ക്​ പോകുന്ന സമയത്ത്​ ബസ്സുകളിൽ ഉൾക്കൊള്ളാവുന്ന ആളുകളിൽ 50 ശതമാനം​ പേരെ മാത്രമേ കയറ്റാൻ പാടുള്ളൂ. അറഫയിലും മുസ്​ദലിഫയിലും തമ്പുകളിൽ ഒരോ 10​ തീർഥാടകർക്കും 50 ചതുരശ്ര മീറ്റർ എന്ന തോതിൽ സ്ഥലം വേണം. തീർഥാടകരുടെ എണ്ണം നിശ്ചിത എണ്ണത്തിൽ കൂടരുത്​. ജംറകളിലെ കല്ലേറിന്​ സമയക്രമം ഒരുക്കണം. ഒരോ നിലയിലും ഒരേ സമയം 50 തീർഥാടകരിൽ കൂടരുത്​.​ തീർഥാടകർക്കിടയിൽ ചുരുങ്ങിയത്​ ഒന്നര മീറ്റർ സാമൂഹിക അകലം പാലിച്ചിരിക്കണം.