എണ്ണടാങ്കറുകൾക്ക്​ നേരെ ആക്രമണം: ചരക്കുഗതാഗത ഭീഷണിയെ അന്താരാഷ്​ട്ര സമൂഹം ഒറ്റക്കെട്ടായി ചെറുക്കണം- സൗദി

ജിദ്ദ: യു.എ.ഇ തീരത്ത്​ സൗദി എണ്ണടാങ്കറുകൾക്ക്​ നേരെയുണ്ടായ ആക്രമണത്തെ സൗദി അറേബ്യ ശക്​തമായി അപലപിച്ചു. രണ്ട്​ ടാങ്കറുകൾക്ക്​ കാര്യമായ കേടുപാട്​ സംഭവിച്ചതായി ഉൗർജമന്ത്രി എൻജി. ഖാലിദ്​ അൽ ഫാലിഹ്​ സ്​ഥിരീകരിച്ചു. എന്നാൽ ആക്രമണത്തിൽ ആൾനാശമോ എണ്ണചോർച്ചയോ സംഭവിച്ചിട്ടില്ല. അമേരിക്കയിലേക്കുള്ള എണ്ണക്കപ്പലാണ്​ ആക്രമണത്തിന്​ വിധേയമായത്​. ലോകത്തെ ചരക്കുഗതാഗതത്തിന്​ നേരെയുള്ള ഭീഷണിയെ അന്താരാഷ്​ട്രസമൂഹം ഒറ്റക്കെട്ടായി ചെറുക്കേണ്ടതുണ്ടെന്ന്​ അദ്ദേഹം പറഞ്ഞു.

ലോകത്തെ എണ്ണവിപണിക്കും ​ സമ്പദ്​വ്യവസ്​ഥക്കും ഭീഷണിയാണിത് എന്ന്​ അദ്ദേഹം പറഞ്ഞു​. ഫുജൈറ തീരത്ത്​ നാല്​ ചരക്കുകപ്പലുകൾക്കുനേരെയാണ് കഴിഞ്ഞ ദിവസം ആക്രമണം നടന്നത്​. മേഖലയിലൂടെയുള്ള ചരക്കുനീക്കം അടിമറിക്കാൻ ഇറാനോ അവരുമായി ബന്ധമുള്ളവരോ ശ്രമിക്കുമെന്ന്​ അമേരിക്ക മുന്നറിയിപ്പു നൽകിയതിനു പിന്നാലെയായിരുന്നു ആക്രമണം.​