എണ്ണരംഗത്ത്​ കൂടുതൽ സഹകരണത്തിന്​ ഇന്ത്യയും സൗദിയും

ജിദ്ദ: എണ്ണരംഗത്തെ സഹകരണം വർധിപ്പിക്കാൻ ഇന്ത്യയും സൗദി അറേബ്യയും ധാരണയിലെത്തി. ന്യൂഡൽഹി സന്ദർശിക്കുന്ന സൗദി ഉൗർജ മന്ത്രി ഖാലിദ്​ അൽഫാലിഹും ഇന്ത്യൻ എണ്ണ മന്ത്രി ധർമേന്ദ്ര പ്രധാനും നടത്തിയ ചർച്ചകളിലാണ്​ തീരുമാനം. ഇന്ത്യൻ എണ്ണപാടങ്ങളുടെ വികസനത്തി​​െൻറ രണ്ടാംഘട്ടത്തിൽ സൗദി അറേബ്യക്ക്​ പങ്കാളിത്വം വാഗ്​ദാനം ചെയ്​തതായി ധർമേന്ദ്ര പ്രധാൻ വ്യക്​തമാക്കി.  

ഇന്ത്യൻ പടിഞ്ഞാറൻ തീരത്തെ നിർദിഷ്​ട​ 1.2 മില്യൻ ബാരൽ എണ്ണ ശുദ്ധീകരണ ശാലക്കും ദക്ഷിണേന്ത്യയിൽ പെട്രോകെമിക്കൽ പദ്ധതി നടപ്പാക്കുന്നതിനും നിക്ഷേപമിറക്കുന്ന കാര്യവും സൗദി അറേബ്യയുമായി ചർച്ച ചെയ്​തിട്ടുണ്ട്​. ന്യായമായ വിലക്ക്​ സൗദിയിൽ നിന്ന്​ എണ്ണ ലഭ്യമാക്കുന്നതിനെ കുറിച്ചും ആലോചനയുണ്ടായി. സൗദി അറേബ്യയുടെ താൽപര്യത്തിന്​ ദോഷകരമാകാതെ തന്നെ ഇന്ത്യയുടെ റിഫൈ​നറികൾക്ക്​ അത്​ ലാഭകരമാകുന്നതാണെന്നും മന്ത്രി പറഞ്ഞു.