കഴുതക്കയര്‍ കഴുത്തില്‍ കുടുങ്ങി മരിച്ച തമിഴ്നാട്ടുകാര​െൻറ മൃതദേഹം നാട്ടിലെത്തിച്ചു

ബുറൈദ: കഴുതക്കയര്‍ കഴുത്തില്‍ കുടുങ്ങി മരിച്ച തമിഴ്നാട്ടുകാര​​െൻറ മൃതദേഹം  നാട്ടിലെത്തിച്ച്​ സംസ്​കരിച്ചു. തഞ്ചാവൂര്‍ നടുവില്‍ക്കോട്ട സ്വദേശി കതിര്‍വേല്‍ ത്യാഗരാജ​​െൻറ (53) മൃതദേഹമാണ് ഞായറാഴച് നാട്ടില്‍ സംസ്കരിച്ചത്. അഫീഫില്‍ മൂന്ന് മാസം മുമ്പാണ് അപകടം നടന്നത്. ആട്ടിടയനായി ജോലി ചെയ്തിരുന്ന ത്യാഗരാജന്‍ ആടുകളെ മേയ്​ക്കാന്‍ കഴുതുപ്പുറത്താണത്രെ പോയിരുന്നത്.ഈ സമയം കഴുതയുടെ കഴുത്തിലെ കയര്‍ സ്വന്തം കഴുത്തില്‍ കുടുക്കിയിടുന്ന പതിവ് ഇയാള്‍ക്കുണ്ടായിരുന്നു. തീറ്റ കഴിഞ്ഞ് ആട്ടിന്‍ കൂട്ടം ലാവണത്തിലേക്ക് ഓടിക്കയറവെ പതിവില്ലാതെ കഴുതയും കൂടെ ഓടുകയായിരുന്നു. ഈ സമയം സ്വന്തം കഴുത്തില്‍ കയര്‍ മുറുകുകയും ലാവണത്തി​​െൻറ ഇരുമ്പുഗേറ്റില്‍ തലയിടിച്ച്​ തല്‍ക്ഷണം മരിക്കുകയുമായിരുന്നു.   മൃതദേഹം അഫീഫ് ജനറല്‍ ആശുപത്രി മോര്‍ച്ചറിയിലായിരുന്നു. 

മരണത്തില്‍ സംശയമുണ്ടെന്ന് കാട്ടി  ഭാര്യ റിയാദ് ഇന്ത്യന്‍ എംബസി അധികൃതര്‍ക്ക് കത്തയച്ചതിനെ തുടര്‍ന്ന് ശുമൈസി ആശുപത്രിയില്‍നിന്ന് സർജൻ അഫീഫിലെത്തി പോസ്​റ്റ്​മോര്‍ട്ടം നടത്തി. തലക്കേറ്റ ക്ഷതമാണ് മരണകാരണമെന്നായിരുന്നു റിപ്പോര്‍ട്ട്. എംബസി അധികൃതര്‍ ചുമതലപ്പെടുത്തിയതനുസരിച്ച് അഫീഫ് മലയാളി സമാജം പ്രവര്‍ത്തകരായ ഷാജി ആലുവ, റഷീദ് അരീക്കോട് എന്നിവര്‍ മുന്‍കൈയെടുത്താണ് നടപടികള്‍ പൂര്‍ത്തിയാക്കിയത്. അഞ്ച് വര്‍ഷം മുമ്പ് സൗദിയിലെത്തിയ ത്യാഗരാജന്‍ അവധി കഴിഞ്ഞ് നാട്ടില്‍നിന്ന് മടങ്ങിയതി​​െൻറ മൂന്നാമത്തെ ആഴ്​ചയാണ് സംഭവം.ഒരു മാസത്തെ ശമ്പളം നല്‍കിയത് കൂടാതെ മൃതദേഹം നാട്ടിലയക്കുന്ന ചെലവ് വഹിച്ചതും സ്പോണ്‍സര്‍ തന്നെയാണെന്ന്  ഷാജി ആലുവ പറഞ്ഞു. ഭുവനേശ്വരിയാണ് ഭാര്യ.  നാല് പെണ്‍മക്കളും ഒരു മകനുമുണ്ട്.