ദമ്മാം ജയിലിൽ ഇന്ത്യക്കാരുടെ എണ്ണം കൂടുന്നു; പകുതിയിലധികം മലയാളികൾ

ദമ്മാം: ഇടവേളക്ക്​ ശേഷം ഇപ്പോൾ ദമ്മാം ജയിലിൽ ഇന്ത്യൻ തടവുകാരുടെ എണ്ണം വർദ്ധിക്കുന്നതായി ഇന്ത്യൻ എംബസി വളൻറിയർമാർ അറിയിച്ചു. നിലവിൽ 400 ന്​ മുകളിൽ ആളുകളാണ്​ ദമ്മാമിലെ സെൻട്രൽ ജയിലിൽ ശിക്ഷ അനുഭവിക്കുന്നത്​. ഇതിൽ 200 ഓളം പേർ മലയാളികളാണ്​. കഴിഞ്ഞ വർഷം കേവലം 165 പേർ ഉണ്ടായിരുന്ന സ്ഥാനത്താണ്​ ഇത്തവണ എണ്ണം 400 ആയി വർധിച്ചത്​.

നേരത്തെ മയക്കുമരുന്ന്​ ഉപയോഗത്തിനിടയിൽ പിടിയിലായ മലയാളി ഇന്ത്യൻ സ്കൂൾ വിദ്യാർഥി രണ്ടുവർഷത്തെ ശിക്ഷ പൂർത്തിയാക്കി അടുത്തവർഷം നാട്ടിലേക്ക്​ മടങ്ങും. ഇതിനൊപ്പം പിടിയിലായ മറ്റൊരു മലയാളി വിദ്യാർഥി ശിക്ഷാകാലാവധി കഴിഞ്ഞും ജയിലിൽ തുടരുകയാണ്​. ഇരുവരുടേയും കുടുംബം ഇപ്പോഴും ദമ്മാമിലുണ്ട്​. തങ്ങളുടെ നിയന്ത്രണത്തിൽനിന്നും വിട്ടുപോയ മക്കളെ ജയിൽവാസത്തിന്​ ശേഷം പുറത്തിറങ്ങുമ്പോൾ കുറ്റകൃത്യങ്ങളിൽ നിന്ന്​ അകന്നു​നിൽക്കുന്നവരായി തങ്ങൾക്ക്​ ലഭിക്കുമെന്ന പ്രതീക്ഷയിലാണ്​ മാതാപിതാക്കൾ.

മയക്ക്​ മരുന്നിനെതിരെയുള്ള വേട്ട സൗദി പൊലീസ്​ ശക്തമാക്കിയതോടെയാണ്​ പിടിയിലാകുന്നവരുടെ എണ്ണം വർദ്ധിച്ചത്​. നേരിയ സംശയം തോന്നുന്നവരുടെ വാഹനങ്ങൾ അരിച്ചുപെറുക്കി പരിശോധിക്കുകയാണ്​. മയക്കുമരുന്നുമായി പിടിയിലായ മിക്ക മലയാളികൾക്കും മറ്റു രാജ്യക്കാരായ മയക്കുമരുന്ന്​ കച്ചവടക്കാരുമായി ബന്ധമുള്ളവരാണ്​. പെ​ട്ടെന്ന്​ പണമുണ്ടാക്കാനുള്ള മാർഗം അന്വേഷിച്ചാണ്​ അധികം പേരും ഇത്തരം റാക്കറ്റുകളിൽ പെടുന്നത്​.

ആറുവർഷം​ മുമ്പ്​ മയക്കുമരുന്ന്​ കേസിൽപെട്ട ഏതാനും മലയാളികളുടെ വധശിക്ഷ നടപ്പാക്കിയതിനുശേഷം ഇത്തരത്തിലുള്ള ശിക്ഷകളിൽ മലയാളി സാന്നിധ്യം കുറഞ്ഞിരുന്നതാണ്​. തമിഴരും മലയാളികളും മദ്യക്കടത്ത്​ കേസിലാണ്​ അധികവും ജയിലിൽ എത്തിയിരുന്നത്​. ഇപ്പോഴത്​ മയക്കുമരുന്ന്​ ഉപയോഗത്തിലേക്കും വിൽപനയിലേക്കും കടന്നിരിക്കുകയാണ്​. ഒപ്പം മറ്റ്​ കേസുകളിൽപെട്ട്​ ശിക്ഷ അനുഭവിക്കുന്നരുമുണ്ട്​.

മകളെ പീഡിപ്പിച്ച മലയാളിയായ പിതാവിന്​ ആദ്യം വിധിച്ച മൂന്ന്​ വർഷ തടവ്​​ മേൽകോടതി 15 വർഷമായി ദീർഘിപ്പിച്ചിട്ടുണ്ട്​. പീഡിപ്പിക്ക​പ്പെട്ട മകളും മാതാവും ഇദ്ദേഹത്തിന്​ മാപ്പ്​ കൊടുക്കാൻ തയാറായെങ്കിലും അപ്പേഴേക്കും ശിക്ഷ വിധിക്കപ്പെട്ടിരുന്നു. ​ശിക്ഷാകാലാവധി കഴിഞ്ഞും ജയിലിൽ തുടരുന്നവരുടെ എണ്ണവും കൂടുകയാണ്​. രണ്ടാഴ്​ച​ മുമ്പ്​ ഇന്ത്യൻ എംബസി തടവിലുള്ള ഇന്ത്യക്കാരുടെ വിവരങ്ങൾ പൂർണമായും ശേഖരിച്ചതായി എംബസി വളൻറിയറും സാമൂഹിക പ്രവർത്തകനുമായ മണിക്കുട്ടൻ പറഞ്ഞു.