കണക്ഷൻ വിമാനങ്ങൾ കിട്ടിയില്ല; റിയാദിലെത്തിയ മലയാളി നഴ്​സുമാർക്ക്​ കെ.എം.സി.സി തുണയായി

റിയാദ്: കോവിഡ് മഹാമാരിക്കെതിരെയുള്ള സൗദി അറേബ്യയുടെ പോരാട്ടത്തിൽ പങ്കാളികളാകാൻ നാട്ടിൽ നിന്ന്​ അവധി കഴിഞ്ഞ്​ തിരിച്ചെത്തിയ നഴ്സുമാർക്ക് സ്നേഹ  തണലൊരുക്കി റിയാദ് കെ.എം.സി.സി സെൻട്രൽ കമ്മിറ്റി. കണക്ഷൻ വിമാനം വൈകിയത് മൂലം റിയാദിൽ കുടുങ്ങിയ 49 നഴ്​സുമാർക്കാണ്‌ കെ.എം.സി.സി പ്രവർത്തകർ  തുണയായത്. മക്ക, ഹഫർ അൽബാതിൻ തുടങ്ങി സൗദിയുടെ വിവിധ ഭാഗങ്ങളിലേക്ക് പോകേണ്ട ഇവരെ റിയാദ്​ വിമാനത്താവളത്തിൽ നിന്ന്​ കെ.എം.സി.സി  പ്രവർത്തകരെത്തി ഹോട്ടലിലേക്ക് മാറ്റുകയായിരുന്നു. വൈകീ​േട്ടാടെ ആരോഗ്യമന്ത്രാലയ അധികൃതരെത്തി ഇവരെ ഹോട്ടലിൽ നിന്നും പ്രിൻസസ് നൂറ യൂനിവേഴ്സിറ്റി ഗസ്​റ്റ്​ ഹൗസിലേക്ക് മാറ്റി.

ബുധനാഴ്ച രാത്രി പത്ത് മണിയോടെയാണ്‌ സൗദി എയർലൈൻസ് വിമാനത്തിൽ കൊച്ചിയിൽ നിന്നും 134 മലയാളി നഴ്സുമാർ റിയാദ് അന്താരാഷ്​ട്ര  വിമാനത്താവളത്തിലെത്തിയത്. ഇതിൽ 49 നഴ്സുമാർക്കാണ്‌ യാത്രാ കര്യം ലഭ്യമാവാതിരുന്നത്. യാത്ര പുറപ്പെടുമ്പോൾ തന്നെ ഇതു സംബന്ധമായ അനിശ്ചിതത്വം  നിലവിലുണ്ടായിരുന്നെന്നും എന്നാൽ റിയാദിലെത്തുന്ന മുറക്ക് യാത്രാസൗകര്യം ഒരുക്കുമെന്നായിരുന്നു എംബസിയിൽ നിന്നും ലഭിച്ച വിവരമെന്നും നഴ്സുമാർ പറഞ്ഞു. കൂടെയുണ്ടായിരുന്ന മറ്റുള്ളവർക്ക് റിയാദിൽ നിന്ന്​ രാജ്യത്തെ വിവിധ ഭാഗങ്ങളിലേക്ക്​ കണക്ഷൻ വിമാനങ്ങൾ ലഭിച്ചതിനെ തുടർന്ന് അവരെല്ലാം വിവിധ ഭാഗങ്ങളിലേക്ക്  യാത്ര തിരിച്ചു. എന്നാൽ മണിക്കൂറുകൾ കാത്തിരുന്നിട്ടും കൃത്യമായ വിവരമൊന്നും ലഭിക്കാതിരുന്നത് കൊണ്ടാണ്‌ റിയാദ് കെ.എം.സി.സി സെൻട്രൽ കമ്മിറ്റി പ്രസിഡൻറ്​  സി.പി. മുസ്തഫയുമായി നഴ്സുമാർ ഫോണിൽ ബന്ധപ്പെടുകയും താൽക്കാലിക താമസ സൗകര്യമൊരുക്കണമെന്ന് അഭ്യർഥിക്കുകയും ചെയ്തത്.

ഇതേതുടർന്ന് സെൻട്രൽ  കമ്മിറ്റി വെൽഫെയർ വിങ്​ ചെയർമാൻ സിദ്ദീഖ് തുവ്വൂരി​​െൻറ നേതൃത്വത്തിൽ ഉടൻ തന്നെ വാഹനങ്ങളുമായി പ്രവർത്തകർ വിമാനത്താവളത്തിലെത്തുകയും നഴ്സുമാരെ  എല്ലാവരെയും അവിടെ നിന്നും ബത്ഹയിലെ അപ്പോളോ ഡിമോറ ഹോട്ടലിലേക്ക് മാറ്റുകയും ചെയ്തു. ഇന്നലെ രാത്രി മുതൽ വിമാനത്താവളത്തിൽ കാത്തിരുന്ന ഇവരെ  ഇന്ന് രാവിലെ ഏഴോടെയാണ്‌ പ്രവർത്തകരെത്തി ഹോട്ടലിലേക്ക് മാറ്റിയത്. ഈ വിഷയം സിദ്ദീഖ് തുവ്വൂർ വിമാനത്താവള അധികൃതരുമായി സംസാരിക്കുകയും  വിമാനത്താവള മാനേജരടക്കമുള്ള ഉന്നത ഉദ്യോഗസ്ഥരെ അറിയിക്കുകയും ചെയ്തിരുന്നു. ഹോട്ടലെത്തി വിശ്രമിച്ച നഴ്സുമാർക്ക് ഭക്ഷണവും കെ.എം.സി.സി എത്തിച്ചു  നൽകി. പിന്നീട് വൈകീ​േട്ടാടെ ഇവരെ ഹോട്ടലിൽ നിന്നും ആരോഗ്യ വകുപ്പ്​ അധികൃതർ ഏറ്റെടുത്തു. വനിതാ കെ.എം.സി.സി പ്രവർത്തകർ ഇവർക്കാവശ്യമായ  സഹായങ്ങൾ നൽകാൻ രംഗത്തുണ്ടായിരുന്നു. അബ്​ദുൽ മജീദ് പയ്യന്നൂർ, ഷംസു പെരുമ്പട്ട, ശിഹാബ് കൊടിയത്തൂർ, ഹുസൈൻ കുപ്പം, മജീദ് പരപ്പനങ്ങാടി, മെഹബൂബ്  കണ്ണൂർ, അഷ്​റഫ് പയ്യന്നൂർ, കുഞ്ഞിമുഹമ്മദ് തുടങ്ങിയവർ സഹായത്തിനായി രംഗത്തുണ്ടായിരുന്നു.