പുതിയ ഉംറ സീസൺ ഇന്നു മുതൽ

ജിദ്ദ: ഉംറ സീസണിലേക്കുള്ള ഒരുക്കം പൂർത്തിയായി. മുഹർറം ഒന്നായ ശനിയാഴ്ച​ മുതൽ ആരംഭിക്കുന്ന സീസൺ 10​ മാസത്തിലധികം നീണ്ടുനിൽക്കും. തീർഥാടകരെ സ്വീകരിക്കാൻ മക്കയിലും മദീനയിലും വിവിധ വകുപ്പുകൾക്ക്​ കീഴിൽ എല്ലാ ഒരുക്കവും പൂർത്തിയായി. വിവിധ സൗകര്യങ്ങളാണ് തീർഥാടകർക്കായി ഹജ്ജ്​-ഉംറ മന്ത്രാലയം ഒരുക്കിയിട്ടുള്ളത്​. വിദേശ തീർഥാടകർക്ക്​ ഉംറക്കും മദീനയിലെ റൗദ സന്ദർശനത്തിനും 'ഇഅ്​തമർനാ' മൊബൈൽ ആപ്ലിക്കേഷൻ വഴിയാണ് അനുമതിപത്രം നേടേണ്ടത്. കോവിഡ്​ ഭീതി നിലനിന്നിരുന്ന കഴിഞ്ഞ ഉംറ സീസണിൽ 15 ലക്ഷത്തിലധികം ഉംറ തീർഥാടകരെത്തിയെന്നാണ്​ കണക്ക്​​.

ഈ വർഷം അതിലും കൂടുതൽ തീർഥാടകരെത്തുമെന്നാണ്​ പ്രതീക്ഷിക്കുന്നത്​. രാജ്യത്തിനകത്ത്​ 500ലധികം ഉംറ സേവന സ്ഥാപനങ്ങൾ തീർഥാടകരുടെ സേവനത്തിനായുണ്ടാകും. ജീവനക്കാർക്കു​വേണ്ട പരിശീലന പരിപാടികൾ അതതു സ്ഥാപനങ്ങൾ പൂർത്തിയാക്കിയിട്ടുണ്ട്​​. ലോകത്തെ വിവിധ രാജ്യങ്ങളിലായി ഹജ്ജ്-ഉംറ മന്ത്രാലയം അംഗീകാരം നൽകിയ 2,000ത്തിലധികം ഏജൻറുമാരുമുണ്ട്​. ഗ്രൂപ്പുകൾക്കും വ്യക്തികൾക്കുമായി നിശ്ചിത പാക്കേജുകൾ നിജപ്പെടുത്തിയിട്ടുണ്ട്.

മന്ത്രാലയത്തിന്റെ അംഗീകാരമുള്ള 34 തദ്ദേശീയ, അന്തർദേശീയ ഇലക്ട്രോണിക് റിസർവേഷൻ പ്ലാറ്റ്‌ഫോമുകളിൽ ഈ പാക്കേജുകളെ കുറിച്ച് അറിയാം​. 68ലധികം ട്രാൻസ്പോർട്ട് കമ്പനികൾക്ക് ജനറൽ ഓട്ടോമൊബൈൽ സിൻഡിക്കേറ്റ് അംഗീകാരം നൽകിയിട്ടുണ്ട്.

ഇരുഹറം കാര്യാലയവും ഉംറ തീർഥാടകരെ സ്വീകരിക്കുന്നതിനുള്ള എല്ലാ ഒരുക്കവും പൂർത്തിയാക്കിയിട്ടുണ്ട്​. ഹജ്ജ്​ ഉംറ മന്ത്രാലയവുമായി സഹകരിച്ച്​ തീർഥാടകർക്ക്​ മികച്ച സേവനങ്ങൾ പ്രദാനം ചെയ്യാൻ ആവശ്യമായ ശിൽപശാലകൾ നടത്തി. തീർഥാടകരുടെ സുരക്ഷയും അവർക്ക് മികച്ച സേവനങ്ങൾ നൽകുകയും ചെയ്യുക എന്ന ലക്ഷ്യത്തോടെ ഇരുഹറം കാര്യാലയം എല്ലാ നടപടികളും പൂർത്തിയാക്കിയതായി എക്​സിക്യൂട്ടിവ്​ ആൻഡ്​ ഡവലപ്​മെൻറ്​ കാര്യ അണ്ടർ സെക്രട്ടറി മുഹമ്മദ്​ അൽജാബിരി പറഞ്ഞു. ഈ വർഷം ഉംറ സീസണിൽ ഒരു കോടി തീർഥാടകരെ സ്വീകരിക്കാനാണ്​ ലക്ഷ്യമിടുന്നതെന്നും തീർഥാടകർക്ക് ഹറമിൽ സുഗമമായി നീങ്ങാൻ വിവിധ വകുപ്പുകളുമായി സഹകരിച്ച്​ പ്രവർത്തിക്കുമെന്നും ഹജ്ജ്​-ഉംറ മന്ത്രാലയ അണ്ടർ സെക്രട്ടറി അബ്​ദുൽ അസീസ്​ അൽവിസാൻ പറഞ്ഞു.