അൽജൗഫിലേക്ക്​ ട്രെയിൻ സർവീസ്​ ഉദ്​ഘാടനം നവംബർ ഏഴിന്​, റിയാദിൽ നിന്ന്​ അൽഹദീദയിലേക്കുള്ള വടക്കൻ റെയിൽവേയുടെ മൂന്നാം ഘട്ടമാണിത്​​

റിയാദ്​: സൗദി ഗതാഗതരംഗത്തെ സ്വപ്​ന പദ്ധതികളിലൊന്നായ വടക്കൻ റെയിൽവേയുടെ മൂന്നാം ഘട്ടം ഉദ്​ഘാടനത്തിലേക്ക്​. റിയാദിൽ നിന്ന്​ അൽജൗഫിലേക്കുള്ള​ ട്രെയിൻ സർവീസ്​ നവംബർ ഏഴിന്​ ആരംഭിക്കും. സൗദി ​പ്രസ്​ ഏജൻസിയാണ്​ ഇക്കാര്യമറിയിച്ചത്​. ഒന്നാം ഘട്ടത്തിൽ ബുറൈദയിലേക്കും രണ്ടാം ഘട്ടത്തിൽ ഹാഇലിലേക്കുമാണ്​ സർവീസ്​ തുടങ്ങിയത്​. അവശേഷിക്കുന്നത്​ ജോർദാൻ അതിർത്തിയിൽ അൽഖുറയാത്തിന്​ സമീപം അൽഹദീദയിലേക്കുള്ള നാലാം ഘട്ടം മാത്രമാണ്​. ഇതോടെ രാജ്യത്തെ ഏറ്റവും വലിയ റെയിൽവേ പാതയിലെ ഗതാഗതം പൂർണമാകും.
ഹാഇലിൽ നിന്ന്​ അൽജൗഫിലേക്കുള്ള പാതയുടെയും അൽജൗഫ്​ സ്​റ്റേഷ​​​െൻറയും നിർമാണപ്രവർത്തനങ്ങൾ പൂർത്തിയായി. പാതയിലൂടെ രാത്രി ഗതാഗതവും പരീക്ഷിച്ച്​ അറിഞ്ഞ ശേഷമാണ്​ സൗദി റെയിൽവേയ്​സ്​ കമ്പനി ഡയറക്​ടർ ബോർഡ്​ ഗതാഗതം തുടങ്ങാൻ അന്തിമാംഗീകാരം നൽകിയതെന്ന്​ കമ്പനി ചെയർമാൻ ഡോ. ബഷാർ ബിൻ ഖാലിദ്​ അൽമാലിക്​ പറഞ്ഞു. അൽജൗഫ്​ ഉൾപ്പെടെ നാല്​ സ്​റ്റേഷനുകളാണ്​ പുതുതായി പണിതത്​. യാത്രക്കാർക്ക്​ സുരക്ഷിതവും സുഖപ്രദവുമായ യാത്രയ്​ക്ക്​ വേണ്ട നൂതന സൗകര്യങ്ങളോടെയാണ്​​ പാതയും സ്​റ്റേഷനുകളും ട്രെയിനുകളും സജ്ജമായിരിക്കുന്നതെന്നും ഡോ. അൽമാലിക്​ കൂട്ടിച്ചേർത്തു.
പാത യാഥാർഥ്യമാക്കാൻ എല്ലാ പിന്തുണയും നൽകിയ അൽജൗഫ്​ ഗവർണർ അമീർ ബദർ ബിൻ സുൽത്താൻ ബിൻ അബ്​ദുൽ അസീസിനും ​ഗതാഗത മന്ത്രി ഡോ. നബീൽ അൽഅമൂദിക്കും അദ്ദേഹം നന്ദി അറിയിച്ചു. എല്ലാ ​ബോഗികളിലും ബർത്ത്​ സൗകര്യമുണ്ടെന്നും ട്രെയിനിൽ കാറുകൾ കൊണ്ടുപോകാനുള്ള പ്രത്യേക ട്രെയിലറുകളുണ്ടാകുമെന്നും കമ്പനി കോർപറേറ്റ്​ കമ്യൂണിക്കേഷൻസ്​ ആൻഡ്​ മാർക്കറ്റിങ്​ ഡയറക്​ടർ ജനറൽ അമ്മാർ അൽനഹ്​ദി അറിയിച്ചു. 377 യാത്രക്കാരെ ഉൾക്കൊള്ളാനുള്ള ശേഷിയാണ്​ ഒാരോ ട്രെയിനുമുണ്ടാകുക​. അതിൽ 238 സീറ്റുകൾ ഇകണോമിക്​ ക്ലാസ്​ വിഭാഗത്തിലും 43 സീറ്റുകൾ ബിസിനസ്​ ക്ലാസിലുമായിരിക്കും. രണ്ട്​​ ക്ലാസുകളിലും ഇൻറർനെറ്റും ട്രെയിൻ സംബന്ധിച്ച വിവരങ്ങളുടെ സ്​ക്രീൻ ഡിസ്​പ്ലേയുമുണ്ടാകും. പുറമെ പാൻട്രി കാറും ആരാധനാസൗകര്യവുമുണ്ടാകുമെന്നും കമ്പനി വെബ്​സൈറ്റിൽ നിന്നും അതാത്​ സ്​റ്റേഷനുകളിൽ നിന്നും ടിക്കറ്റ്​ ബുക്ക്​ ചെയ്യാമെന്നും അദ്ദേഹം കൂട്ടിച്ചേർത്തു. പാതയിൽ രാത്രിയിലും ട്രെയിൻ സർവീസുണ്ടാകും.
2017 ഫെബ്രുവരി 26നാണ്​ വടക്കൻ റെയിൽവേയുടെ ആദ്യഘട്ടം ഉദ്​ഘാടനം ചെയ്യപ്പെട്ടത്​. അന്ന്​ റിയാദിൽ നിന്ന്​ ബുറൈദ വരെയാണ്​ ട്രെയിൻ സർവീസ്​ ആരംഭിച്ചത്​.
രണ്ടാംഘട്ടമായി നവംബർ 26ന്​ ഹാഇലിലേക്കും സർവീസ്​ തുടങ്ങി. 2019 അവസാനം അൽഖുറയാത്തി​ലേക്കും സർവീസ്​ ആരംഭിക്കും. അതോടെ ഇൗ പദ്ധതി പൂർണതയിലെത്തും.