പുതിയ ‘കിസ്​വ’ കൈമാറി, മുഹറം ഒന്നിന്​​ കഅ്​ബയെ അണിയിക്കും

മക്ക: പുതിയ വർഷാരംഭത്തിൽ കഅ്​ബയെ പുതിയ പുടവ അണിയിക്കുന്നതിനായി കിസ്​വ കൈമാറ്റം നടന്നു. സൽമാൻ രാജാവിനുവേണ്ടി മക്ക ഡെപ്യൂട്ടി ഗവർണർ അമീർ സഉൗദ് ബിൻ മിശ്​അൽ ആണ്​ കഅ്​ബയുടെ സുക്ഷിപ്പുകാരൻ​ അബ്​ദുൽമലിക് ബിൻ ത്വഹ അൽശൈബിക്ക്​ പുതിയ കിസ്​വ കൈമാറിയത്​. ഇതിനായുള്ള കൈമാറ്റ രേഖയിൽ ഹജ്ജ്-ഉംറ മന്ത്രിയും ഇരുഹറംകാര്യ ജനറൽ പ്രസിഡൻസി ഡയറക്ടർ ബോർഡ് ചെയർമാനുമായ ഡോ. തൗഫീഖ് അൽറബീഅയും കഅ്​ബയുടെ താക്കോൽ സൂക്ഷിപ്പുകാരൻ അബ്​ദുൽമലിക് ബിൻ ത്വഹ അൽശൈബിയും ഒപ്പുവെച്ചു.

മുഹറം ഒന്നിന്​ കിസ്‌വ മാറ്റിസ്ഥാപിക്കും. അതിനുള്ള തയാറെടുപ്പുകളുടെ ഭാഗമാണ് ഈ കൈമാറ്റ ചടങ്ങ്. കിസ്​വ നിർമാണത്തി​െൻറ ആരംഭം മുതൽ മാറ്റിസ്ഥാപിക്കൽ പൂർത്തീകരിക്കുന്നതുവരെ എല്ലാ ഘട്ടങ്ങളിലുമുള്ള ഭരണകൂടത്തി​െൻറ പ്രതിബദ്ധതയും കരുതലും പ്രതിഫലിപ്പിക്കുന്നതാണിത്​. കറുത്ത പ്രകൃതിദത്ത പട്ട്​ ഉപയോഗിച്ചാണ് കഅ്​ബയുടെ കിസ്‌വ കിങ്​ അബ്​ദുൽ അസീസ് കിസ്​വ കോംപ്ലക്‌സിൽ നിർമിച്ചിരിക്കുന്നത്​.

ഇതിന്​ 14 മീറ്റർ ഉയരവും 12 മീറ്റർ നീളവുമുണ്ട്​. അതി​െൻറ മുകളിലെ മൂന്നിലൊന്ന്​ ഭാഗത്ത്​ 95 സെൻറിമീറ്റർ വീതിയും 47 മീറ്റർ നീളവുമുള്ള ഒരു ബെൽറ്റ് ഉണ്ട്. ഇസ്​ലാമിക അലങ്കാരങ്ങളിൽ സ്വർണ, വെള്ളി നൂലുകളിൽ ഖുർആൻ വചനങ്ങളാൽ അലങ്കരിച്ച ചതുരാകൃതിയാൽ ചുറ്റപ്പെട്ട 16 കഷ്​ണങ്ങൾ ഇതിൽ അടങ്ങിയിരിക്കുന്നു. 200-ഒാളം തൊഴിലാളികൾ 10​ മാസമെടുത്താണ്​ കിസ്​വ നിർമിക്കുന്നത്​.