പുതിയ വിമാനത്താവളം; സൗദി എയർലൈൻസ്​ ഒരുക്കങ്ങൾ പൂർത്തിയായി

ജിദ്ദ: ജിദ്ദയിലെ പുതിയ കിങ്​ അബ്​ദുൽ അസീസ്​ അന്താരാഷ്​ട്ര വിമാനത്താവളത്തിലേക്ക്​ പ്രവർത്തനങ്ങൾ​ മാറ്റുന്നതിനുള്ള ഒരുക്കങ്ങൾ സൗദി എയർലൈൻസ്​ പൂർത്തിയാക്കി. വിവിധ വകുപ്പുകളുമായി സഹകരിച്ച്​ പുതിയ വിമാനത്താവളത്തിൽ പ്രവർത്തനം ആ​രംഭിക്കുന്നതിനുള്ള  നടപടികൾ പൂർത്തിയാക്കാൻ പ്രത്യേക  സംഘത്തെ നിയോഗിച്ചിട്ടുണ്ട്​. ഇവ പൂർത്തിയായാൽ ആഭ്യന്തര, വിദേശ സർവീസുകൾ പുതിയ വിമാനത്താവളത്തിൽ നിന്നായിരിക്കും. 
ഒരുക്കങ്ങൾ വിലയിരുത്താൻ സൗദി എയർലൈൻസ്​ മേധാവി എൻജി. സ്വാലിഹ്​ അൽജാസിർ വിമാനത്താവളം സന്ദർശിച്ചു.

സൗദി എയർലൈൻസിന്​ ഒരുക്കിയ ഭാഗങ്ങളും സൗകര്യങ്ങളും പരിശോധിച്ച അദ്ദേഹം ക്രമീകരണങ്ങൾ വിലയിരുത്തി. പുതിയ വിമാനത്താവളത്തിലേക്ക്​ പ്രവർത്തനങ്ങളും സേവനങ്ങളും ​ മാറാൻ സൗദി എയർലൈൻസ്​ പൂർണമായും സജ്ജമായതായി അദ്ദേഹം പറഞ്ഞു. ദേശീയ വിമാന കമ്പനിയായ സൗദി എയർലൈൻസി​​​െൻറ പദ്ധതികൾക്കും സേവനങ്ങൾക്കും വലിയ സഹായകമാകുന്നതാണ്​ പുതിയ സംവിധാനങ്ങൾ. അത്യാധുനിക രീതിയിൽ, നൂതന സംവിധാനങ്ങളോടും സൗകര്യങ്ങളോടും കൂടിയതാണ്​ പുതിയ വിമാനത്താവളമെന്നും അദ്ദേഹം പറഞ്ഞു. അടുത്ത മാസം വിമാനത്താവളം പരീക്ഷണാടിസ്​ഥാനത്തിൽ പ്രവർത്തിപ്പിച്ചു തുടങ്ങുമെന്ന്​ സിവിൽ ഏവിയേഷൻഅതോറിറ്റി നേരത്തെ അറിയിച്ചിരുന്നു​. ഇതിനുള്ള അവസാനഘട്ട ഒരുക്കങ്ങൾ പൂർത്തിയായിവരികയാണ്​.  വിമാനത്തികത്തേക്ക്​ കയറാൻ സ്​ഥാപിച്ച എയ്​റോ ബ്രിഡ്​ജുകളു​ടെ പരീക്ഷണം വിജയകരമായിരുന്നു.