മ്യാന്‍മര്‍ വംശഹത്യയെ  സൗദി മന്ത്രിസഭ അപലപിച്ചു 

റിയാദ്: റോഹിങ്ക്യന്‍ മുസ്​ലീംകൾക്ക്​   നേരെ മ്യാന്‍മറില്‍ നടക്കുന്ന വംശീയ ഉന്‍മൂലനത്തെ സൗദി മന്ത്രിസഭ ശക്തമായ ഭാഷയില്‍ അപലപിച്ചു. സല്‍മാന്‍ രാജാവി​​െൻറ അധ്യക്ഷതയില്‍  ചേർന്ന മന്ത്രിസഭാ യോഗമാണ് മുസ്​ലീം ന്യൂനപക്ഷത്തിനെതിരെ നടക്കുന്ന അവകാശ ലംഘനത്തെ അപലപിച്ചത്. മ്യാന്‍മര്‍ ഭരണകൂടം നടത്തുന്ന അവകാശ ലംഘനത്തിനെതിരെ അന്താരാഷ്​ട്ര വേദികള്‍ ഉണര്‍ന്ന് പ്രതികരിക്കണമെന്നും മന്ത്രിസഭ അഭ്യര്‍ഥിച്ചു. മൃഗീയമായ പീഡനമാണ് റോഹിങ്ക്യന്‍ മുസ്​ലീം ന്യൂനപക്ഷത്തോട് കാണിക്കുന്നത്.

വിവേചനം കൂടാതെ പൗരന്മാര്‍ക്ക് അവകാശപ്പെട്ട ആനുകൂല്യങ്ങള്‍ റോഹിങ്ക്യന്‍ മുസ്​ലീംകള്‍ക്ക് ലഭിക്കാന്‍ ഐക്യരാഷ്​ട്രസഭ ഉള്‍പ്പെടെ  അന്താരാഷ്​ട്ര വേദികള്‍ സജീവമായി രംഗത്തിറങ്ങണമെന്നും  മന്ത്രിസഭ അഭ്യര്‍ഥിച്ചു.റോഹിങ്ക്യന്‍ മുസ്​ലീംകള്‍ക്ക് 50 ദശലക്ഷം ഡോളര്‍ സഹായം ഇതിനകം നൽകിയതായി മന്ത്രിസഭ അറിയിച്ചു. സൗദിയിലെത്തിയ  റോഹിങ്ക്യകള്‍ക്ക് അഭയം നല്‍കാൻ രാജ്യം തയറാണ്. 1948 മുതല്‍ ബര്‍മയില്‍ നിന്നുള്ള അഭയാര്‍ഥികള്‍ക്ക് സൗദി അനുഭാവപൂര്‍ണമായ പരിഗണനയാണ് നല്‍കുന്നതെന്ന്​ മന്ത്രിസഭ അനുസ്മരിച്ചു.