സൗദി അറേബ്യയുടെ സ്​ഥിരത മുസ്​ലിം ലോകത്തിന്​ ചുവപ്പ്​​ രേഖ -റാബിത്വ

ജിദ്ദ: സൗദി അറേബ്യയുടെ സ്​ഥിരതയും സുരക്ഷയും മുസ്​ലിം ലോകത്തിന്​ ചുവപ്പ്​​ രേഖയാണെന്ന്​ മുസ്​ലിം വേൾഡ്​ ലീഗ്​ (റാബിത്വ) സുപ്രീം കൗൺസിൽ. സൗദി ഗ്രാൻറ്​ മുഫ്​തിയും റാബിത്വ സുപ്രീം കൗൺസിൽ അധ്യക്ഷനുമായ ശൈഖ്​ അബ്​ദുൽ അസീസ്​ ബിൻ അബ്​ദുല്ല ആലുശൈഖി​​​െൻറ നേതൃത്വത്തിൽ നടന്ന 43ാമത് കൗൺസിൽ​ യോഗമാണ്​ പ്രസ്​താവന പുറപ്പെടുവിച്ചത്​. സൗദി അറേബ്യയെ അപകീർത്തിപെടുത്തുക ലക്ഷ്യമിട്ട്​ മനപൂർവ്വം നടത്തുന്ന ​ശ്രമങ്ങളെ യോഗം അപലപിച്ചു. സൗദി ഭരണകൂടത്തിനും ജനങ്ങൾക്കും പൂർണ പിന്തുണയും ​െഎക്യദാർഢ്യവും യോഗം പ്രഖ്യാപിച്ചു. മുസ്​ലിം ലോകത്തിന്​ അർഹമായ സൗദിയുടെ ​ നേതൃത്വത്തെ ഒരു തരത്തിലും തെറ്റായ ആരോപണങ്ങൾക്ക്​ ഇല്ലാതാക്കാൻ കഴിയില്ല. ഇരുഹറമുകൾക്ക്​ സേവനം ചെയ്യുന്നതിൽ ഏറെ അഭിമാനിക്കുന്ന, മുസ്​ലിം മനസ്സുകളിൽ ആഴത്തിൽ ഇടംനേടിയ രാജ്യമാണ് സൗദി​.

​ലോകത്ത്​ സുരക്ഷയും സമാധാനവും സംരക്ഷിക്കാൻ തീവ്രവാദത്തിനും ഭീകരതക്കുമെതിരെ ശക്​തമായി നിലകൊണ്ട രാജ്യമാണിത്​​. സൗദി ഭരണാധികാരിക്കും അതി​​​െൻറ നിലപാടുകൾക്കും​ മുസ്​ലിം ലോകപണ്​ഡിതന്മാർ ശക്​തി പകരുന്നത്​ ഇതി​​​െൻറ തെളിവാണെന്നും യോഗം അഭിപ്രായപ്പെട്ടു. ഫലസ്​തിൻ, സിറിയ, യമൻ, റോഹിങ്ക്യൻ മുസ്​ലിം പ്രശ്​നങ്ങൾ, തീവ്രവാദ നിർമാർജനം, വിവിധ മത സംസ്​കാരങ്ങൾ തമ്മിലുള്ള സംവാദം തുടങ്ങിയ വിഷയങ്ങൾ യോഗം ചർച്ച ചെയ്​തു. മുസ്​ലിം വേൾഡ്​ ലീഗ്​ ജനറൽ സെക്രട്ടറി ഡോ. മുഹമ്മദ്​ ബിൻ അബ്​ദുൽ കരീ​മി​​​െൻറ സാന്നിധ്യത്തിലായിരുന്നു യോഗം​. മുസ്​ലിം പണ്ഡിതന്മാരും മതകാര്യ മന്ത്രിമാരുമായി 45 ഒാളം അംഗങ്ങൾ യോഗത്തിൽ പ​െങ്കടുത്തു.