സൗദിയിൽ പുതിയ രോഗബാധിതർ ഒരാഴ്​ചക്ക്​ ശേഷവും മൂന്നൂറിന്​ മുകളിൽ

റിയാദ്​: സൗദി അറേബ്യയിൽ തുടർച്ചയായി എട്ടാം ദിവസവും മുന്നൂറിന്​ മുകളിൽ പുതിയ രോഗികൾ. ബുധനാഴ്​ച പുറത്തുവിട്ട കണക്ക്​ പ്രകാരം 369 പേർക്കാണ്​ പുതുതായി കോവിഡ്​ ബാധ സ്ഥിരീകരിച്ചത്​​. തലസ്ഥാന നഗരത്തിലാണ്​ പുതിയ രോഗികളിൽ കൂടുതലും. എന്നാൽ രോഗമുക്തി നിരക്ക്​ വീണ്ടുമയർന്നു. രാജ്യത്താകെ 306 രോഗികൾ സുഖം പ്രാപിച്ചു​. രാജ്യത്ത്​ വിവിധയിടങ്ങളിലായി അഞ്ച്​ മരണങ്ങൾ റിപ്പോർട്ട്​ ചെയ്​തു. ഇതുവരെ രോഗം സ്ഥിരീകരിച്ചവരുടെ ആകെ എണ്ണം 371356 ആയി. ഇതിൽ 362368 പേർ സുഖം പ്രാപിച്ചു. ആകെ മരണസംഖ്യ 6415 ആയി. 2573 പേർ രാജ്യത്തെ വിവിധ ആശുപത്രികളിലും മറ്റുമായി ചികിത്സയിൽ കഴിയുന്നു. അതിൽ 417 പേരുടെ നില ഗുരുതരമാണ്​. ബാക്കിയുള്ളവരുടെ ആരോഗ്യനില തൃപ്​തികരമാണ്​. രാജ്യത്തെ ​കോവിഡ്​ മുക്തി നിരക്ക് 97.6 ശതമാനം ആയി. മരണനിരക്ക്​ 1.7 ശതമാനമാണ്​. കഴിഞ്ഞ 24 മണിക്കൂറിനിടെ വിവിധ മേഖലകളിൽ റിപ്പോർട്ട്​ ചെയ്​ത പുതിയ കൊവിഡ്​ കേസുകൾ: റിയാദ്​ 173, കിഴക്കൻ പ്രവിശ്യ 85, മക്ക 48, അസീർ 11, അൽബാഹ 10, വടക്കൻ അതിർത്തി മേഖല 10, അൽജൗഫ്​ 7, അൽഖസീം 6, മദീന 5, ജീസാൻ 4, നജ്​റാൻ 4, ഹാഇൽ 3, തബൂക്ക്​ 3.