മൊബൈൽ യൂനിറ്റുകളും പ്രാഥമികാരോഗ്യ കേന്ദ്രങ്ങളും വഴി കോവിഡ്​ പരിശോധന ആരംഭിച്ചു

ജിദ്ദ: ​​​കോവിഡ്​ വ്യാപനം തടയാൻ സൗദി ആരോഗ്യവകുപ്പ്​ നടത്തുന്ന ഫീൽഡ്​ കോവിഡ്​ ടെസ്​റ്റ്​ ​പ്രോഗ്രാമി​​െൻറ മൂന്നാംഘട്ടമായി മൊബൈൽ യൂനിറ്റുകളും  പ്രാഥമികാരോഗ്യ കേന്ദ്രങ്ങളും വഴിയുള്ള പരിശോധന ആരംഭിച്ചു. മക്ക, മദീന എന്നിവിടങ്ങളിലാണ് ആദ്യഘട്ടമായി ഇത്​ ആരംഭിച്ചത്​. അടുത്തയാഴ്​ച റിയാദിലും പിന്നീട്​  രാജ്യത്തെ മറ്റ്​ മുഴുവൻ മേഖലകളിലും ഇൗ രീതിയിലുള്ള പരിശോധന പരിപാടി വ്യാപകമാക്കും.

മൂന്നാംഘട്ട ഫീൽഡ്​ പരിശോധന ഉടനെ ആരംഭിക്കുമെന്ന്​ അടുത്തിടെ  ആരോഗ്യ മന്ത്രാലയം അറിയിച്ചിരുന്നു. കോവിഡ്​ വ്യാപനത്തി​​െൻറ തോതറിയാനും വ്യാപനം തടയാനും ജനങ്ങളുടെ ആരോഗ്യ സംരക്ഷണത്തിനുമായി നടപ്പാക്കുന്ന  മുൻകരുതൽ നടപടികളുടെ തുടർച്ചയാണിത്​. രണ്ടാം ഘട്ടത്തിൽ വീടുകളും താമസകേന്ദ്രങ്ങളും സന്ദർശിച്ചുള്ള പരിശോധനയാണ്​ നടന്നുവന്നത്​. ഇനി അതുണ്ടാവില്ല.  പകരം ആരോഗ്യമന്ത്രാലയത്തിന്​ കീഴിൽ പ്രത്യേക മൊബൈൽ യൂനിറ്റുകളും പ്രാഥമികാരോഗ്യകേന്ദ്രങ്ങളും വഴിയാണ്​ പരിശോധന നടത്തുന്നത്​.

നഗര വീഥികളിൽ  മൊബൈൽ യൂനിറ്റുകളൊരുക്കിയും എല്ലാ പ്രദേശങ്ങളിലുമുള്ള പ്രാഥമികാരോഗ്യ കേന്ദ്രങ്ങളിൽ സജ്ജീകരണങ്ങൾ ഏർപ്പെടുത്തിയുമാണ്​ കോവിഡ്​ പരിശോധന നടത്തി​ തുടങ്ങിയത്​. ‘സിഹത്തി’ (my health) എന്ന മൊബൈൽ​ ആപ്ലിക്കേഷൻ വഴിയാണ്​ ഇതിനുള്ള ബുക്കിങ്​ നടത്തേണ്ടത്​.