ദമ്മാമിൽ കാണാതായ മലയാളിയെ കണ്ടെത്തി

ദമ്മാം: ദിവസങ്ങൾക്ക്​ മുമ്പ്​ ദമ്മാമിൽ നിന്ന്​ കാണാതായ മലയാളിയെ കണ്ടെത്തി. പത്തനംതിട്ട എടത്തിട്ട സ്വദേശി അനിഴ് വത്സലനെ 10 ദിവസം മുമ്പാണ്​ അയാൾ ജോലി ചെയ്യുന്ന കമ്പനിയിൽ നിന്നും കാണാതായത്. നവയുഗം സാംസ്​കാരിക വേദി പ്രവർത്തകരുടെ അന്വേഷണത്തിനൊടുവിൽ ദഹ്​റാനിലെ പൊലീസ് സ്​റ്റേഷനിൽ നിന്നാണ്​ കണ്ടെത്തിയത്​. 

ഇയാളെ കാണായതിനെ തുടർന്ന്​ കമ്പനി അധികൃതരും സുഹൃത്തുക്കളും അന്വേഷിക്കുകയും പത്രങ്ങളിലും സാമൂഹിക മാധ്യമങ്ങളിലും ഫോട്ടോ സഹിതം പ്രചരണം നടത്തിയിട്ടും ഫലമുണ്ടായിരു​ന്നില്ല. മാനസികാസ്വാസ്ഥ്യം ഉള്ള വ്യക്തിയായിരുന്നതിനാൽ എന്തെങ്കിലും അപകടം സംഭവിച്ചിരിക്കാമെന്ന ആശങ്കയിലായിരുന്നു കുടുംബാംഗങ്ങൾ. അനിഴി​​​െൻറ നാട്ടിലെ ബന്ധുക്കൾ നവയുഗം കുടുംബവേദി പ്രസിഡൻറ്​ സുമി ശ്രീലാലിനെ ഫോണിൽ ബന്ധപ്പെട്ട് സഹായം തേടുകയായിരുന്നു. ജീവകാരുണ്യവിഭാഗം കൺവീനർ ഷിബുകുമാറി​​​െൻറ നേതൃത്വത്തിൽ അന്വേഷണം നടത്തി. അനിഴി​​​െൻറ സുഹൃത്തും സഹപ്രവർത്തകനുമായ​ അഖിലും അന്വേഷണത്തിൽ പങ്കാളിയായി. ദമ്മാമിലെ വിവിധ ആശുപത്രികൾ, മാനസിക ആരോഗ്യ കേന്ദ്രങ്ങൾ, ജയിലുകൾ, പൊലീസ് സ്​റ്റേഷനുകൾ എന്നിവിടങ്ങളിൽ ​തെരച്ചിൽ നടത്തി. 

ഒടുവിലാണ്​ ദഹ്​റാനിലെ പൊലീസ് സ്​റ്റേഷനിൽ​ കസ്​റ്റഡിയിൽ കഴിയുകയാണെന്ന്​ കണ്ടെത്തിയത്​. മാനസിക നില തകരാറിലായപ്പോൾ ഒരു സൗദി ഭവനത്തിൽ അതിക്രമിച്ചുകയറി ശല്യം ഉണ്ടാക്കിയതിന് ആ വീട്ടുകാർ പരാതിപ്പെട്ടതനുസരിച്ച്​ പൊലീസ് ​കസ്​റ്റഡിയിലെടുക്കുകയായിരുന്നു. കമ്പനി അധികൃതരുടെ സഹായത്തോടെ ജാമ്യത്തിലിറക്കി തിരികെ കമ്പനിയിൽ എത്തിച്ചു. ഫൈനൽ എക്സിറ്റും മറ്റു ആനുകൂല്യങ്ങളും നൽകി അനിഴ് വത്സലനെ തിരികെ നാട്ടിലേക്ക്​ അയക്കാനുള്ള തീരുമാനത്തിലാണ് കമ്പനി അധികൃതർ.