സൗദിക്ക്​ നേരെ നടന്നത്​ 83  ബാലിസ്​റ്റ്​ക്​ മിസൈൽ ആക്രമണങ്ങൾ 

റിയാദ്​: 83 ബാലിസ്​റ്റിക്​ മിസൈലാക്രമണങ്ങളാണ്​ യമനിലെ ഹൂതികൾ  സൗദി അറേബ്യക്ക്​ നേരെ നടത്തിയതെന്ന്​  സഖ്യസേന വക്​താവ്​  കേണൽ  തുർകി  ബിൻ സാലിഹ്​ അൽ മാലികി പറഞ്ഞു. ഇവയെല്ലാം സൗദി നേതൃത്വത്തിലുള്ള സഖ്യസേനക്ക്​ പരാജയപ്പെടുത്താൻ സാധിച്ചു. ഏറ്റവും ഒടുവിൽ ചൊവ്വാഴ്​ച റിയാദിന്​ നേരെ നടന്ന  ആക്രമണമടക്കം  സേന തകർത്തതായി അദ്ദേഹം പറഞ്ഞു. പക്ഷെ അത്​ വലിയ രീതിയിലുള്ള ആക്രമണമായിരുന്നു. ആശ്വാസപ്രവർത്തനത്തി​​​െൻറ മറവിൽ യമനിൽ ആയുധക്കടത്ത്​ നടക്കുന്നതായി സംശയിക്കേണ്ടതുണ്ടെന്നും അദ്ദേഹം പറഞ്ഞു. 

 യമനിൽ സമാധാനം പുനഃസ്​ഥാപിക്കാനുള്ള ശ്രമങ്ങൾ വിജയകരമായി മുന്നേറുകയാണ്​. കിങ്​ സൽമാൻ എയർ ബേസി​​​െൻറ നിയന്ത്രണം 85 ശതമാനത്തോളം ഒൗദ്യോഗിക സർക്കാറി​​​െൻറ നിയന്ത്രണത്തിലായി. ബെഹൻ ഗവർണറേറ്റ്​  നൂറ്​ ശതമാനവും  ഹൂതികളുടെ നിയന്ത്രണത്തിൽ നിന്ന്​ മോചിപ്പിക്കാനായി. 11,000 ഹൂതികൾ കര, വ്യോമാക്രമണങ്ങളിൽ കൊല്ലപ്പെട്ടതായി  സഖ്യസേന വക്​താവ്​ വെളിപ്പെടുത്തി. 6,730 ആയുധങ്ങൾ നശിപ്പിക്കാനായി. യമൻ തലസ്​ഥാനമായ സൻഅ നഗരം ഹൂതികളിൽ നിന്ന്​ മോചിപ്പിക്കുന്ന  നടപടികൾ പുരോഗമിക്കുകയാണ്​.

ഇറാനിയൻ അജണ്ട നടപ്പിലാക്കാനുള്ള ഹൂതികളുടെ നീക്കത്തിനെതിരെ മുഴുവൻ യമൻ ജനതയും അണിനിരക്കണമെന്ന്​ അദ്ദേഹം ആവശ്യപ്പെട്ടു. യമൻ ജനതക്ക്​ സഹായങ്ങൾ എത്തിക്കുന്ന പ്രകിയ തുടരുകയാണെന്ന്​ അദ്ദേഹം പറഞ്ഞു. റിയാദിന്​ നേരെ ആക്രമണം ആവർത്തിക്കുന്ന സാഹചര്യത്തിലും യമനികൾക്ക്​​ സഹായം തുടരുകയാണ്​. യമനിലേക്ക്​ ഇന്ധനവുമായുള്ള കപ്പൽ 30 ദിവസത്തിനകം തുറമുഖത്തെത്തും. യമൻ ജനതക്ക്​  വിപുലമായ രീതിയിൽ സഹായം എത്തിക്കുന്നതിനുള്ള നടപടികൾ പുരോഗമിക്കുകയണെന്ന്​ സൗദി അംബാസഡർ മുഹമ്മദ്​ അൽ ജാബിർ പറഞ്ഞു.  യു.എൻ സഹായവും മറ്റും ഏകോപിപ്പിക്കുന്നതിനുള്ള പദ്ധതി തയാറാക്കി വരികയാണ്​. സഹായം എത്തിക്കാനുള്ള സുരക്ഷിതമായ വഴികൾ ഉറപ്പാക്കുന്നുണ്ട്​.

റിയാദ്​ ലക്ഷ്യമാക്കി ഹൂതികൾ രണ്ടാം തവണയും ഇറാൻ നിർമിത ബാലിസ്​റ്റിക്​ മിസൈൽ ആക്രമണം നടത്തിയ സാഹചര്യത്തിലാണ്​ സഖ്യസേന വക്​താവ്​ മാധ്യമങ്ങളെ കണ്ടത്​.  അതേ സമയം ആക്രമണത്തിനെതിരെ ലോകരാജ്യങ്ങൾ സൗദി അറേബ്യക്ക്​ പിന്തുണ അറിയിച്ചു കൊണ്ടിരിക്കയാണ്​. എല്ലാവിധ അന്താരാഷ്​ട്ര നിയമങ്ങളും ലംഘിച്ചുകൊണ്ടാണ്​ ഹൂതികൾ ഇറാൻ സഹായത്തോടെ ആക്രമണം നടത്തുന്നത്​ എന്ന വിമർശനം ശക്​തമായിരിക്കയാണ്​.