നിയമലംഘനത്തിന്​ സൗദിയിൽ നിന്ന്​ നാടുകടത്തിയത്​ 7,30,00 വിദേശികളെ

റിയാദ്​: വിസ, തൊഴിൽ നിയമങ്ങൾ ലംഘിച്ച 7,30,00 വിദേശി തൊഴിലാളികളെ സൗദിയിൽ നിന്ന്​ നാടുകടത്തിയതായി അധികൃതർ അറിയിച് ചു. നിയമലംഘകരെ കണ്ടെത്താനുള്ള നടപടിക്കിടെയാണ്​​​ 17 മാസത്തിനിടെ ഇത്രയധികം ആളുകൾ നാടുകടത്തലിന്​ വിധേയരായത്​. 2017 നവംബർ 15 മുതലാണ്​ ആഭ്യന്തര മന്ത്രാലയം നിയമലംഘകർക്കെതിരെ കർശന നടപടി തുടങ്ങിയത്​.

പാസ്​പോർട്ട്​ വിഭാഗം ജനറ ൽ ഡയറക്​ടറേറ്റ്​, തൊഴിൽ സാമൂഹിക വികസന മന്ത്രാലയം എന്നിവ ഉൾപ്പെടെ 19 വിവിധ സർക്കാർ വകുപ്പുകളുടെ സഹായത്തോടെ​ രാജ്യവ്യാപകമായി പരിശോധന ഇപ്പോഴും തുടരുകയാണ്​​. ഇഖാമ, തൊഴിൽ നിയമങ്ങളുടെ ലംഘനം, അതിർത്തി നുഴഞ്ഞുകയറ്റം എന്നീ കുറ്റങ്ങൾക്ക്​ ഇതുവരെ ആകെ പിടിയിലായത്​ 29,03,531 ആളുകളാണ്​. 3,94,392 ആളുകളുടെ​ യാത്രാരേഖകൾ ഇഷ്യു ചെയ്യാൻ​ അതാത്​ രാജ്യങ്ങളുടെ എംബസികൾക്കും കോൺസുലേറ്റുകൾക്കും അറിയിച്ചിട്ടുണ്ട്​. 4,92,878 പേരുടെ യാത്രാനടപടികൾ പൂർത്തിയായി. 11,197 ആളുകൾ ഇപ്പോഴും രാജ്യത്തെ വിവിധ നാടുകടത്തൽ കേന്ദ്രത്തിൽ കഴിയുകയാണ്​.

അതിൽ 9,569 പേർ ആണുങ്ങളും 1,628 സ്​ത്രീകളുമാണ്​. 3,586 ആളുകൾ പിടിയിലായത്​ നിയമലംഘകർക്ക്​ താമസ, ഗതാഗത സൗകര്യങ്ങൾ ഒരുക്കിയതിനാണ്​. അതിൽ 1,199 പേർ സൗദികളാണ്​. 1,148 പേർ ഇതിൽ ശിക്ഷിക്കപ്പെട്ടു. 51 ആളുകളുടെ കേസ്​ തുടരുന്നു. ‘നിയമലംഘകരില്ലാത്ത രാജ്യം’ എന്ന പേരിൽ 2017 മാർച്ച്​ 29ന്​ പൊതുമാപ്പ്​ പ്രഖ്യാപിക്കുകയും മൂന്നു മാസ കാലാവധി നൽകുകയും ചെയ്​തിരുന്നു.

ഇൗ കാലത്തിനുള്ളിൽ മുഴുവൻ നിയമലംഘകരോടും രാജ്യം വിട്ടുപോകാനാണ്​ ആവശ്യപ്പെട്ടിരുന്നത്​. ബന്ധപ്പെട്ട മുഴുവൻ സർക്കാർ വകുപ്പുകളും കൈകോർത്ത്​ അതിനുവേണ്ടിയുള്ള സൗകര്യങ്ങളും ഒരുക്കി. നിയമം ലംഘിച്ചതിനുള്ള സാമ്പത്തിക പിഴയൊ തടവുശിക്ഷയോ ഒന്നും കൂടാതെ രാജ്യം വിട്ടുപോകാനുള്ള പൊതുമാപ്പാണ്​ നൽകിയിരുന്നത്​. മൂന്നുമാസത്തിന്​ ശേഷവും പലതവണ കാലാവധി നീട്ടി നൽകി. ഏഴര മാസമാണ്​ ഇങ്ങനെ മൊത്തത്തിൽ പൊതുമാപ്പ്​ കാലം അനുവദിച്ചത്​. പാസ്​പോർട്ട്​ വിഭാഗവും (ജവാസാത്ത്​) അതാത്​ രാജ്യങ്ങളുടെ സൗദിയിലെ നയതന്ത്രകാര്യാലയങ്ങളും ചേർന്ന്​ ഇത്തരക്കാർക്ക്​ നാടുകളിലേക്ക്​ മടങ്ങാൻ വേണ്ട എല്ലാ സൗകര്യങ്ങളും ചെയ്​തുകൊടുത്തു. ആറ്​ ലക്ഷം നിയമലംഘകർ ആദ്യ നാല്​ മാസ കാലയളവിൽ പൊതുമാപ്പ്​ പ്രയോജനപ്പെടുത്തി നാടുവിട്ടു.

പിന്നേയും ലക്ഷക്കണക്കിനാളുകൾ ബാക്കിയായി. വീണ്ടും മൂന്നര മാസത്തെ സാവകാശം കൂടി കിട്ടിയിട്ടും ആളുകൾ ബാക്കിയാവുകയായിരുന്നു. അവരെ കണ്ടെത്താണ്​ ആ വർഷം നവംബർ 15 മുതൽ കർശന പരിശോധന തുടങ്ങിയത്​. പൊതുമാപ്പ്​ മുതലുള്ള കാലത്തിനിടെയാണ്​ 30 ലക്ഷത്തിനടുത്താളുകൾ പിടിയിലായത്​. സൗദി അറേബ്യയിലെ മൊത്തം ജനസംഖ്യയായ 32 ദശലക്ഷത്തിൽ 12 ദശലക്ഷം വിദേശികളാണ്​.