മഷാഇർ മെട്രൊ ട്രെയിന്‍ സൗകര്യം ലഭിക്കുക 68000 ഇന്ത്യൻ ഹാജിമാര്‍ക്ക് 

മക്ക: ഇത്തവണ മഷാഇർ മെട്രൊ ട്രെയിന്‍ സൗകര്യം ലഭിക്കുക 68000 ഇന്ത്യൻ ഹാജിമാര്‍ക്ക്. ഇന്ത്യന്‍ ഹജ്ജ്​ മിഷന്​ കിഴിലെത്തിയ 68000 ഹാജിമാര്‍ക്ക്​ ട്രെയിനിലും ബാക്കിവരുന്ന ഹാജിമാര്‍ക്ക് ബസ്സിലുമായിരിക്കും യാത്ര.  ഹജ്ജ് ചടങ്ങുകള്‍ നടക്കുന്ന പ്രധാന കേന്ദ്രങ്ങളായ മിന, മുസ്​ദലിഫ, അറഫ, ജംറാത്ത് എന്നിവിടങ്ങളിലേക്കാണ് ഹാജിമാര്‍ക്ക് ഹജ്ജ് ദിവസങ്ങളിൽ യാത്ര ചെയ്യേണ്ടത്.  യാത്രാസംവിധാനം ഒരുക്കൽ ഹജ്ജ് എജന്‍സിയുടെ (മുതവിഫ് ) ഉത്തരവാദിത്തമാണ്​. ഈ വർഷം ഇന്ത്യന്‍ ഹജ്ജ് മിഷന് കിഴിലെ ഹാജിമാര്‍ 34  ഹജ്ജ് എജന്‍സികളുടെ കിഴിലാണ് എത്തിയിട്ടുള്ളത്​. ഇതില്‍ മക്തബ് നമ്പര്‍ 26 മുതല്‍ 44 വരെയുള്ള (33 ഒഴികെ) 17 മക്തബുകളിലുള്ള 68000 ഹാജിമാർക്കാണ് ഇത്തവണ ട്രെയിനില്‍ യാത്ര ചെയാന്‍ സൗകര്യം ലഭ്യമായത്​. ബാക്കി വരുന്ന 17 മക്​തബുകളിലുള്ള 60,000 ഹാജിമാർ ബസ്​ മാര്‍ഗം യാത്ര ചെയ്യേണ്ടി വരും. ഇവര്‍ക്ക് ഹജ്ജ് എജന്‍സികൾ പ്രത്യേക ബസ്​ ഒരുക്കും.  മാശാഇര്‍ മെട്രോയിലേക്ക് നടന്നെത്താന്‍ കഴിയുന്ന ദൂരത്തിലുള്ള മക്​തബിലെ ഹാജിമാരെയാണ്​  ട്രെയിൻ യാത്രക്ക്​ പരിഗണിക്കുന്നത്. മെട്രോയില്‍ യാത്ര ചെയ്യാന്‍ വേണ്ട ടിക്കറ്റുകള്‍ (വളകള്‍ ) ദുല്‍ഹജ്ജ് ഏഴിന്​  മുമ്പായി അതതു ബ്രാഞ്ചുകളിലെ ഖാദിമുല്‍ ഹുജ്ജാജ് വഴി വിതരണം ചെയ്യും. ബസുകളില്‍ യാത്ര ചെയ്യുന്ന ഹാജിമാര്‍ക്ക് നല്ല ബസുകൾ ഏർപ്പെടുത്താന്‍ ഹജ്ജ് എജന്‍സികളോട് ഇന്ത്യന്‍ ഹജ്ജ് മിഷന്‍ ആവശ്യപ്പെട്ടിട്ടുണ്ടെന്ന്​ കോണ്‍സല്‍ ജനറല്‍ മുഹമ്മദ്‌ നൂര്‍ റഹ്​മാന്‍ ശൈഖ്​ ‘ഗള്‍ഫ് മധ്യമത്തോട്’ പറഞ്ഞു. കഴിഞ്ഞ വർഷം ബസ് മാര്‍ഗം യാത്ര ചെയ്​ത ഇന്ത്യന്‍ ഹാജിമാരുടെ അറഫാ യാത്ര താമസിച്ചതിനെ തുടർന്നുണ്ടായ പ്രയാസം കണക്കിലെടുത്ത്​ ​ മതിയായ നടപടികള്‍ സ്വീകരിച്ചതായും അദ്ദേഹം പറഞ്ഞു.