അടുക്കളയിൽ മൻസൂർ ചു​ട്ടെടുക്കുന്നത്​​ തെരഞ്ഞെടുപ്പ്​ ഗാനങ്ങൾ

ദമ്മാം: നാട്ടിലെ തെരഞ്ഞെടുപ്പ്​ ഗോദയിൽ മുഴങ്ങുന്ന ആവേശകരമായ പല പാട്ടുകളും സൗദി അറേബ്യയിലെ ഹോട്ടൽ ജോലിക്കിടയിൽ ഒരു ചെറുപ്പക്കാരൻ ചു​െട്ടടുക്കുന്നതാ​െണന്ന്​ അധികമാർക്കുമറിയില്ല. ഹോട്ടലിലെ പാചകജോലിക്കിടയിലും ഇൗ ഗാനരചയിതാവ്​ തദ്ദേശ തെരഞ്ഞെടുപ്പിലേക്ക്​ കുറഞ്ഞ നാളുകൾക്കുള്ളിൽ എഴുതിത്തീർത്തത്​ അമ്പതോളം ഗാനങ്ങൾ​. അൽഖോബാർ അസീസയിലെ ഊട്ടുപുര ഹോട്ടലിൽ 'ഷെഫ്'​ആയി ജോലി ചെയ്യുന്ന മലപ്പുറം എടപ്പാൾ സ്വദേശി മൻസൂറാണ്​ (35) ഈ ഗാനശിൽപി.

അഞ്ചുവർഷം മുമ്പാണ്​ മൻസൂർ പ്രവാസിയായത്​. ഹോട്ടൽ ജോലികഴിഞ്ഞ്​ മുറിയിലെത്തു​േമ്പാൾ കുടുംബ പ്രാരബ്​ദങ്ങളുടെ ഓർമകൾ മറക്കാനാണ്​ മൻസൂർ പാ​ട്ടെഴുതിത്തുടങ്ങിയത്​. പ്രവാസികളെക്കുറിച്ചുള്ള പാട്ടുകളിലായിരുന്നു തുടക്കം. നാട്ടിലുള്ള സുഹൃത്തുക്കൾ വഴി അത്​ റെക്കോഡ്​ ചെയ്​ത്​ കേട്ടപ്പോൾ എല്ലാവരും നല്ല അഭിപ്രായം പറഞ്ഞു. പിന്നീട്​ അത്​ സപര്യയായി മാറി. ഇതോടെ പിറന്നത്​ നൂറുകണക്കിന്​ പാട്ടുകൾ. കോവിഡ്​ കാലത്ത്​ പ്രവാസികൾക്ക്​ സാന്ത്വനം പകർന്ന്​ മൻസൂർ എഴുതിയ ഗാനം യൂട്യൂബിൽ സൂപ്പർ ഹിറ്റായി. 'പ്രിയമുള്ള പ്രവാസികളെ...തണലേകും പ്രവാസികളെ... തനിച്ചല്ല നിങ്ങൾ... കൂടയുണ്ട്​ ഞങ്ങൾ' എന്ന ഗാനം നാടുമുഴുവൻ ഏറ്റെടുത്തു.

ടിക്​ടോക്കിലും വാട്​സ്ആപ്​ ഗ്രൂപ്പുകളിലും ലക്ഷങ്ങൾ ഇത്​ ​ ആസ്വദിച്ചു​. കഴിഞ്ഞ മാസമെഴുതിയ 'ജന്നത്തിൻ റാണി' എന്ന മാപ്പിളപ്പാട്ട്​ യൂട്യൂബിൽ ഇതുവരെ കണ്ടത്​ അരലക്ഷത്തിലേറെ പേർ. കഴിഞ്ഞ പാർലമെൻറ്​ തെരഞ്ഞെടുപ്പുകാലത്ത്​ സുഹൃത്തുക്കളുടെ നിർബന്ധമാണ്​ ഇ.ടി. മുഹമ്മദ്​ ബഷീറിനും കുഞ്ഞാലിക്കുട്ടിക്കും വേണ്ടി ഓരോ പാ​െട്ടഴുതി തെരഞ്ഞെടുപ്പ്​ ഗാനരചനയിലേക്ക്​ കടക്കാൻ പ്രേരണയായത്​​. ആ പാട്ടുകൾ ഹിറ്റായി മാറുകയും മൻസൂർ രാഷ്​ട്രീയക്കാരുടെ ശ്രദ്ധാകേന്ദ്രമാവുകയും ചെയ്​തു. അങ്ങനെയാണ്​ തദ്ദേശ തെരഞ്ഞെടുപ്പ്​ മൻസൂറിന്​ സർഗാത്മകതയുടെ ചാകരയായി മാറിയത്​. കോൺഗ്രസിനും ലീഗിനും പി.ഡി.പിക്കും ഇടതുപക്ഷത്തിനുമെല്ലാം ഒരുപോലെ തൂലിക ചലിപ്പിക്കുന്നു ഇൗ കവി. ഇടതുമുന്നണിക്കുവേണ്ടി 'ഭരണം...ഈ നാടിനാകെ സുകൃതം...തുടരും നല്ലകാലം' എന്ന്​ പാ​ട്ടെഴുതുന്ന മൻസൂർ തന്നെയാണ്​ കോൺഗ്രസുകാർക്ക്​ വേണ്ടി 'നീതിയില്ല ധർമമില്ല നാടിതിനോ രക്ഷയില്ല ഇടതു സംഘികൾ തകർത്ത സുന്ദരനാട്​' എന്നെഴുതിയത്​.

പി.ഡി.പിക്ക്​ വേണ്ടി 'മാറ്റത്തിനായി വോട്ട്​ വഞ്ചിയിൽ തന്നെ നൽകണേയെന്ന്​' ഇടതുവലത്​ മുന്നണികളെ പ്രതികൂട്ടിൽ നിർത്തി മൻസൂർ എഴുതുന്നു. ബി.ജെ.പിക്കും എസ്.ഡി.പി.ഐക്കും വേണ്ടി ഇതുവരെ പാട്ടുകൾ എഴുതിയിട്ടില്ല. നാടുമുഴുവൻ താനെഴുതിയ ഗാനങ്ങൾ ആവേശത്തിരകൾ തീർക്കു​േമ്പാൾ ആരുമറിയാതെ മൻസൂർ അടുക്കളയുടെ കനൽചൂടിൽ പുതിയ ഗാനങ്ങൾ ചൂ​ട്ടെടുക്കുന്ന ഒരുക്കത്തിലാവും. ഗൾഫിലെ എടപ്പാളുകാരുടെ കൂട്ടായ്​മയായ 'എടപ്പാളയ'ത്തി​െൻറ ഈസ്​റ്റേൺ ചാപ്​റ്റർ ജോയൻറ്​ സെക്രട്ടറിയാണ്​. നാട്ടിലുള്ള ഭാര്യ ഫസീലയും മക്കളായ ആയിഷ ഹന്നത്തും ഫാത്വിമ മിന്നയും അജ്​മൽ ഹാദിയും എല്ലാവിധ പിന്തുണയുമായി ഒപ്പമുണ്ട്​.